- Publika iha: 15 Abril 2014
Instituisaun Polisia Nasional Timor-Leste (PNTL) iha ona planua atu sosa tan farda foun hamutuk 13.500 iha tinan 2014 ne’e.
Xefe Logistika Komando Jeral PNTL, Superintendente Basilio de Jesus, hateten Sekretariu Estadu Seguransa (SES) halo ona akordu ho kompania hodi fornese farda ne’ebe iha kualidade diak.
“Farda ne’ebe nia koor ne’e tuir duni PNTL nian atributu no hakarak,” Xefe Logistika de Jesus hateten, iha Kaikoli, Dili.
Farda sira ne’e, nia dehan, fahe ba tipu rua; tipu ida mak PDH seluk fali PDL, ba farda PDH rasik sei uja iha loron Segunda to’o Kinta, enkuantu PDL uja ba operasional nian.
Ba farda PDL nia hateten, sei sosa 7.000 no ba PDH hamutuk 6.500, enkauntu total orsamentu hamutuk $1 miliaun 800 e tal.
Iha fatin seluk Deputada Anna Ribeiro, rekonese katak husi orsamentu tinan ida ne’e (2014) Parlamentu Nasional aprova duni orsamentu sosa farda ba PNTL nian.
“Maibe governu no polisia nasional atu hili kompania ne’ebe diak, nune’e bele fornese farda ne’ebe ho kualidade,” Deputada Ribeiro sujere.
Nia hato’o kestaun ne’e tanba dalaruma kompania balun hakarak osan deit, maibe fornese sasan ne’ebe laiha kualidade.