- Publika iha: 07 Agosto 2014
Polisia Servisu Investigasaun Kriminal konsege rejistu kazu krimi hamutuk 315 kazus durante fulan rua (Abril-Maiu 2014) nia laran.
Komandante Ezersisiu, Inspektor Xefe Manuel Alves, hateten iha fulan Abril total kazu hamutuk 157 no fulan Maiu hamutuk 158.
“Kazu ho tipu ofensas ba integridade fisika simples no kazu violensia domestika (VD) mak nia volume a’as,” Inspektor Xefe Manuel Alves hateten, iha Kaikoli, Dili.
Tanba bazea ba estatistika, iha fulan Abril kazu VD as ho total 55 no kazu ofensas ba integridade fisika simples hamutuk 52, nune’e mos iha fulan Maiu kazu ofensas integridade fisika hamutuk 31, no VD hamutuk 21.
Tuir Komandante Alves kazu seluk hanesan kazu omesido no kazu krimi grave ne’e nia total kazu ladun a’as.
“Hanesan kazu omesido iha fulan abril hat deit, no iha fulan maiu 3 deit,” Xefe Alves hateten.
Nia hatutan, kazu krimi sira ne’e barak liu akontese iha distritu Dili no iha distritu Ermera.
Iha fatin seluk Deputadu Virgilio da Costa Hornai, sente hakfodak tanba iha fulan rua deit kazu krimi bele atinji numeru ne’ebe ke bo’ot.
Tanba ne’e, nia husu, ba governu atu bele interven hodi halo prevensaun ba krimi sira ne’e.
Nia dehan, atu kombate krimi ofensas ba integridade fisika simples polisia tenke halo vizilansia rutina iha fatin risku konflitu.
“No kona ba violensia domestika ne’e governu tenke haforsa liu tan sosializasaun lei kontra violensia, atu nune’e bele minimiza kazu violensia iha rai laran,” Deputadu Hornai sujere.