- Publika iha: 22 Setembro 2014
Tribunal Distrital Dili julga kazu maun ho alin hadau malu uma ne’ebe involve arguido AS no lezada MB.
Tuir akuzasaun Ministeriu Publiku ne’ebe lee sai husi Juis Prezident Antonio Gonsalves, katak iha data 25 Maiu 2013, lezada MB husu ba arguido atu sai husi uma ne’e, tanba vitima nia oan atu hela.
Iha altura ne’eba arguido lakohi sai, tanba arguido sente iha direitu ba uma refere, tanba durante ne’e arguido mak proteze uma ne’e wainhira lezada iha foho.
Tanba arguido lakohi sai antaun lezada ba ba bolu nia (lezada) laen hodi kolia didiak ho arguido, maibe tanba arguido nervosu lori katana duni fali lezada iha lezada nia uma hodi amiansa atu oho lezada.
Maibe iha altura ne’eba lezada tauk nune’e lezada konsege halai ba polisia hodi kesar arguido.
Hafoin le’e sai akuzasaun hirak ne’e juis Antonio Gonsalves husu ba arguido hakarak kolia ou nonok hodi prova katak akuzasaun hirak ne’e los hotu.
Maibe atu klarifika buat balun nune’e arguido hili atu kolia, nune tuir arguido nia declarasaun iha tribunal katak durante lezada tinan rua ona iha foho arguido mak hein uma ne’e, maibe ikus mai lezada fila husi foho la kolia didiak maibe duni arguido hanesan animal.
“Ne’e hau la simu tanba nervosu hau duni ho katana maibe hanesan habosok deit” dehan arguido iha tribunal.
Iha fatin hanesan lezada mos hato’o nia declarasaun ba tribunal katak nia (lezada) presija los uma ne’e tanba nia oan mane atu mai hela.
“Uma ne’e hau nian duni, hau iha sertifikadu uma nian, to’o agora nia seidauk sai husi hau nia uma ne’e,” dehan Lezada.
Hatan ba ida ne’e juis president hare ba faktus no dokumentus prova katak uma ne’e lezada nian duni no deside arguido atu husik hela uma ne’e ba lezada sein problema.