- Publika iha: 14 Outubro 2014
Tanba laiha karta kondusaun ga Surat Izin Mengemudi (SIM) bainhira lori motor, arguido SM hetan pena prizaun fulan ida no suspende ba tinan ida.
Tuir akuzasaun Ministeriu Publik ne’ebe lee sai husi Juis Prezidente, Duarte Tilman, katak iha fulan Junu 2014, tuku 18:30, iha area Fatuhada arguido SM lori motor ho marka fixon ho sapa matrikula 35.40, maibe laiha karta kondusaun.
Hafoin lee sai akuzasaun ne’e, Juis Duarte Tilman, husu ba arguido hili opsaun atu koalia ou nonok.
Maibe arguido hili koalia, hodi dehan ba tribunal katak arguido trata hela nia karta kondusaun, maibe seidauk hotu.
“Nia prosesu mak kleur duni, hau trata hela,” arguido SM deklara iha Tribunal Distrital Dili (TDD).
Depois rona tiha deklarasaun husi arguido, juis prezidente tama kedas ba alegasaun ikus husi parte defeza, nune’e parte defeza husu ba tribunal atu fo pena ne’ebe adekuadu, tanba argudio nudar estudante, no dokumentus hirak ne’e arguido sei trata hela.
Ho hahalok ne’e Ministeriu Publiku akuza arguido ho krime kondusaun sein karta ne’ebe regula iha kodigu penal Timor-Leste ho artigu 207, ne’ebe hateten ema ne’ebe uja motorizada maskei laiha lisensa ne’ebe lei ejije sei hetan pena prizaun to’o tinan rua ka multa.
Enkuantu julgamentu ne’e rasik halo iha Tribunal Distrital Dili (TDD), no Ministeriu Publiku reprezenta husi Prokurador Renato Bere.