- Publika iha: 27 Outubro 2014
United Nation Development Program (UNDP), prontu apoia Ministeriu Justisa hodi loke klinika judicial iha distritu 13.
Ministru Justisa, Dionisio Babo Soares, hateten Klinika judicial hanesan buat foun ida iha Timor- leste, entaun hahu uluk hanesan projetu pilotu ida.
“Ami sei servisu ho UNDP, sira mak komesa tau osan ajuda uluk ba projetu ida ne’e, ita espera katak tinan oin lao ona,” Ministru Justisa Babo Soares afirma.
Kona ba montante orsamentu ne’ebe UNDP sei aloka ba projtu ne’e, nia hateten sira sei diskuti hela.
Nia hatutan, projetu ne’e sei halo uluk iha distritu tolu uluk, wainhira lao diak ona, husi parte ministeriu sei hare atu loke iha distritu hotu.
“Ami determina komesa iha distritu ida ga tolu hanesan ne’e,” nia hateten.
Tuir Ministru agora dadaun ajensi UNDP mak sei ajuda maibe ba future sei husu ajuda husi estadu.
“Ita aprezenta ba aprovisionamentu, Konselho Ministru, parlamentu hodi estadu tau osan ba programa ne’e,” Ministru Justisa ne’e dehan.
Deputada Albina Marcal, apoia tebes inisiativa ida ne’e, tanba ho maneira ne’e bele hafasil liu komunidade atu asesu ba lei ne’ebe vigor ona iha Timor-Leste.
“Maibe governu presija mos sosializa ba komunidade kona ba funsaun klinika ne’e, nune’e sira bele hetene,” nia sujere.