Sexta, Março 29, 2024
Total visitors: 766366

Membru Parlamentu Nasional konsidera instituisaun Polisia Nasional Timor-Leste (PNTL) oras ne’e dadaun nakonu deit ho preman sira, duke ema professional, tanba membrus barak mak involve iha krime.

Prezidente Komisaun B (seguransa, defeza no negosiu estranjeirus), Deputadu David Dias Ximenes, hateten so preman deit mak baku povu ki’ik sira e durante ne’e membrus polisia balun hatudu hahalok ida ne’e.

“Loron-kalan mak baku hela deit povu ki’ik, ami lamenta e ami komisaun B sei buka tuir polisia preman ne’e no tenke reforma lalais, labele husik livre,” Deputadu Ximenes hateten, iha Parlamentu Nasional.

Deputadu ne’e, hateten Polisia tenke garante lei no orden e la’os sai fali autor baku komunidades iha bairo-bairo ho arbiru deit.

Nia fo ezemplu, hanesan foin dadauk membru Polisia balun halo atuasaun ba kazu tuda malu iha Bairo-Pite iha sangra (fatin artezanatu), membru Polisia Task Force tebe-tuku vitima naran Rivaldo Amaral to’o baixa iha sala ICU Ospital Nasional Guido Valadares (HNGV).

Kona ba kazu ne’e, nia dehan, familia vitima hatama ona karta iha Ministeriu Publiku (MP), “Polisia atua situasaun, la’os ba baku, se baruk servisu karik sai tiha,”.

Iha parte seluk Diretor Fundasaun Mahein (FM), Nelson Belo, konsidera membru polisia hirak ne’ebe involve iha krime ne’e tanba inkapasidade.

 “Ita iha lei, iha tempu ne’ebe mak bele uja forsa no tempu ne’ebe mak uja halo aproximasaun preventive,” Diretor FM Belo hateten.

Tuir nia, polisia halo agresaun hasoru povu, ne’e viola lei asaun criminal, no povo sei lakon fiar ba PNTL.

“Komando Jeral fo sansaun disiplinar ba nia membru ne’ebe mak halo sala no ministeriu  publiku hanesan keixa ida para bele hetan alegasaun ka hetan prosesu judicial,” Belo tenik.

Preokupasoens hanesan hato’o mos husi Estudante 10 de Dezembru, Lorenso Alves, katak durante ne’e polisia sira uja deit forsa hodi atua situasaun.

“Kalan ema tuur deit iha estrada ibun mos sira tun baku arbiru deit, ne’e katak polisia laiha kapasidade atu resolve iha rai laran,” nia dehan.

Hatan ba kestaun ne’e II Komandante Jeral Polisia Nasional Timor-Leste (PNTL), Komisariu Afonso de Jesus, rejeita no ladun konkorda ho liafuan husi Deputadu David Diaz Ximenes ne’ebe hateten preman ba polisia.

“Tanba ema ne’ebe tama polisia ne’e tuir treinamentu no selesaun, la’os naran tama polisia deit,” Komisariu de Jesus hateten.    

Maibe, nia dehan, kaundu membru polisia balun hatudu  atitude krimi hasoru komunidade, komunidade iha dever atu hato’o keixa ba Ministeriu Publiku.