PNTL Estabelese SOD Iha Distritu 12

Polisia Nasional Timor-Leste (PNTL) estabelese Sentru Operasaun Distrital (SOP) iha distritu 12, hodi garantia linha komunikasaun entre sentru operasaun distrital ho sentru operasaun nasional.

Xefe Departamentu Servisu Operasional Nasional, Inspektor Xefe Agusto Tilman, hateten sentru operasaun ne’e nia funsaun mak wainhira akontese problema iha komunidade nia le’et, oinsa mak polisia sira bele halo linha komunikasaun ne’ebe diak husi sentru operasaun distrital mai iha sentru operasaun nasional.

Nia mos hateten, iha sentru operasaun ne’e rasik PNTL sei tau ekipamentus balun ne’ebe ho kualidade hodi bele halo’o servisu. 

“Monta ekipamentus hanesan komputador no sistema balun hodi halais komunikasaun, no kapasita membru polisia sira iha distrital kona ba maneira servisu,”  Inspektor Tilman hateten, iha Kaikoli, Dili.

Nia rekonese, katak durante ne’e sistema seiduak diak, tanba ne’e dala ruma linha komunikasaun sei tarde no ladun efektivu, tanba sentru operasaun distrital laiha.

Enkuantu Sentru Operasaun Distrital ne’e monta iha distritu Suai, Lospalos,Viqueque, Bobonaro,  Manatuto, Ainaro, Ermera, Liquisa, Baucau, Same, Oe-cuss no distritu Aileu. 

Iha fatin seluk Deputadu Cesar Valente, apoia inisiativa ne’e maibe tenke halo uluk estudu viabilidade ida.

“Ne’e diak, maibe tenke garantia nia kontinuasaun nune’e atinji progresu ne’ebe signifikante,” Deputadu Valente hateten.

Tanba tuir nia, dala barak harii tiha sentru barak-barak iha distritu, maibe laiha kontrolasaun no husik abandonadu tiha, ”gasta osan arbiru,” nia dehan.