- Publika iha: 11 Janeiro 2016
Tribunal Munisipal Dili (TMD) julga kazu ofensas integridade simples ne’ebe involve arguido AT (Rian Umane, feto nia alin mane) baku rian fetosan YG (feton nia la’en) tanba YG halo aktu adolteiru.
Bazea ba akuzasaun Ministeriu Publiku ne’ebe lee sai husi juis prezidente, katak iha lokraik maizumenus tuku lima lokraik, arguido tuur hela iha tasi ibun Cristo Re’i ho kolega sira, derepente vitima lori feto ida tesik ba no hakuak malu hanesan fen-la’en, tanba kolega sira hatene katak vitima mak hola arguido nia bin, entaun arguido nia kolega sira sente hakfodak ho hahalok vitima ne’e.
Sente ladun diak, arguido no kolega sira tuur iha eskada iha estatua Cristo Re’i nian hodi hein vitima ho nia doben ne’ebe sei sa’e ba leten. Hafoin vitima ho nia doben tuun, sein liafuan arguido tuku isin ida iha oin no ibun ran no tebe vitima nia kabun, la kleur polisia mai tanba vitima keixa tiha ba polisia.
Hafoin lee akuzasaun hirak ne’e juis prezidente atu husu ba arguido hodi fo nia deklarasaun no direitu atu hili koalia ou nonok, maibe derepente deit vitima husu ba juis atu halo dame deit sira nain rua, tanba vitima rekonese aktu ne’ebe mak nia halo ne’e ladun diak no la merese.
No vitima sente katak saida mak arguido halo ba nia ne’e, hanesan eduka nia atu iha futuru labele halo tan aktu hanesan.
“Hau arepende ho hau nia hahalok no agradese ba hau rian fetosan tanba ne’e parte ida hosi hanorin hau,” vitima deklara iha tribunal.
Hafoin rona tiha ida ne’e, juis prezidente deside atu hadame arguido no vitima no kazu refere arkiva tiha.