- Publika iha: 19 Maio 2016
Tribunal Munisipal Dili (TMD) julga kazu integridade fizika simples ne’ebe involve arguido HS (mane) tanba ku’u hotu lezasa YL (feto) nia aidila tahan sein husu lisensa.
Tuir akuzasaun husi Ministeriu Publiku ne’ebe lee sai husi juis prezidente, hateten iha loron Domingo arguido ho nonok ku’u lezada nia aidila tahan iha uma oin sein husu lisensa ba lezada. No iha altura ne’eba arguido ku’u lezada nia aidila tahan to’o hotu.
Iha momentu ne’eba, lezada la haree dirietamente maibe lezada nia oan mane mak haree hodi dehan ba lezada, tanba sente ladun satisfas ho hahalok ne’ebe mak arguido halo ne’e, lezada ibun-ibun iha uma oin.
Entaun arguido sente aan hodi sai ba liur hodi soe osan dua dolar (besi) iha lezada nia uma oin, hodi dehan, “ne’e hau sosa imi nia aidila tahan, ne’ebe lalika koalia barak”, maibe lezada lakohi simu hodi foti tiha osan ne’e soe fali iha arguido nia uma oin, e wainhira lezada atu fila, arguido sai ba hodi dudu lezada to’o monu.
Hafoin lee sai akuzasaun hirak ne’e, juis prezidente hateten ba arguido no lezada katak kazu ne’e kategoria semi publiku tanba ne’e tribunal halo deit omologu entre arguido no lezada, maibe karik lezada lakohi, bele kontinua kazu ne’e ba oin.
No iha altura ne’eba lezada husu ba juis prezidente atu halo deit omologu entre sira nain rua, tanba durante prosesu ne’e la’o hela, arguido mos hatudu attitude ne’ebe diak ba lezada.
“Nia mai husu deskulpa no ami diak malu ona,” lezada YL deklara, iha audensia julgamentu.
Iha fatin hanesan arguido mos rekonese katak, attitude ne’ebe mak arguido halo ne’e la edukadu e nia arepende hodi la repete aktu hanesan iha futuru.
“Hau hatene saida mak hau halo ne’e la diak no hau arepende los,” nia arepende.
Hafoin rona tiha lezada ho arguido nia deklarasaun, juis prezidente deside absolve tiha kazu ne’e.