- Publika iha: 29 Setembro 2016
Polisia Nasional Timor-Leste (PNTL) kaptura ona suspeitu nain tolu ne’ebe deskonfia produs osan falsu iha postu administrativu Luro, munisipiu Lautem.
Komandate Jeral PNTL Komisariu Julio da Costa Hornai, hateten, suspeitu nain tolu ne’e produs osan falsu ne’e uza makina foto copy.
“Ami prende osan falsu $20 tahan hitu hanesan ne’e, inklui makina foto copy no suspeitu nain tolu ne’ebe deskonfia nudar autor ba kazu ne’e,” Komisariu Hornai hateten iha Kuartel Jeral PNTL Kaikoli, Dili.
Suspeitu nain tolu ne’e, nia dehan agora dadaun iha hela termu indentidade rezidensia (TIR) hodi hein prosesu investigasaun.
Tanba tuir nia, antes tama ba prosesu investigasaun, polisia presiza kompleta tan evidansia balun.
Nia informa mos, katak evidensia hanesan osan falsu, makina foto copy inklui suspeitu nain tolu ne’e, Polisia inkaminha ona ba ministeiru publik munisipu Baucau hodi delega kompetensia ba autor seguransa hodi halo prosesu investigasaun.
Iha sorin seluk Deputadu Paulino Monteiro, husu ba polisia atu investiga kazu ne’e ho seriu, tanba ida ne'e hahalok krime.
“Polisia tenke halo investigasaun klean para sira responsabiliza ba hahalok ne’ebe sira komete,” nia husu.
Iha parte seluk Vise Presidente Parlamentu Nasional Duarte Nunes, hateten Polisia tenke atende ho seriu, atu nune’e iha future aktu ne’e labele buras iha rai laran.
“Ita uza hela rai seluk nia osan, ita falsifika tan, ne’e ladun diak, entaun polisia tenke toma atensaun ba kazu ne’e,” nia hateten.
Nia mos husu ba Parte Banku Nasional Comersiu Timor-Leste (BNCTL) atu halo sosializasaun ba komunidade kona ba osan falsu no osan original.
Atu nune’e komunidade bele informadu, tanba tuir nia wainhira komunidade laiha informasaun kona ba ida ne’e, osan hanesan bele buras iha rai laran.
“Sira presiza hatene, nune’e wainhira sira hetan, sira bele informa ba polisia,” nia hateten.