- Publika iha: 10 Fevereiro 2017
Tanba fen (lezada) la fo osan$10, mane (arguido) ida tenke simu pena prizaun tinan ida no suspensaun ba tinan ida husi Tribunal Munisipal Dili hafoin basa no tebe lezada to’o desmaia.
Tuir akuzasaun husi Ministeriu Publiku ne’ebe lee sai husi juis prezidente, katak iha data 06/08/2015, tuku 8 :00 dadersan, arguido husu osan ba vitima, maibe tanba arguido nia razaun husu osan la klaru, entaun vitima rezeita fo osan ba arguido.
Husu primeiru vitima la fo, husu fali ba dala rua vitima la fo nafatin, entaun arguido tama ba uma laran hodi hasai hotu ropa iha armari laran, inklui halo buradu hotu sasan iha kuartu hodi buka tuir vitima nia kartera, maibe la hetan tanba vitima subar metin.
Haree sasan iha kuatu laran buradu tebes, vitima hakilar no ibun-ibun deit ba arguido, maibe arguido fila basa vitima iha hasan dala rua, tebe vitima to’o monu ba rai to’o desmaia.
Konsidera asaun arguido nian nudar krimi ida, entaun vitima halai hato’o keixa ba polisia hodi prosesa tuir dalan justisa formal.
Hafoin lee sai akuzasaun hirak ne’e juis prezidente husu ba arguido atu hili koalia ou nonok, maibe iha altura ne’eba arguido hili nonok hodi prova katak akuzasaun hirak ne’e los hotu.
Tanba arguido rezeita atu fo nia deklarasaun, entaun juis prezident husu fali ba vitima hodi hili koalia ou nonok maibe lezada hili koalia hodi dehan ba tribunal katak, arguido husu tiha ona deskulpa no promete sei la halo tan aktu hanesan iha futuru.
“Nia rekonese nia salan no husu deskulpa ba hau no hau perdua nia, agora ami nain rua moris hamutuk hela,” lezada deklara iha tribunal, Dili.
Hafoin ne’e, juis prezidente husu ba ministeriu publiku atu tama kedas iha alegasaun, no iha alegasaun ministeriu publiku husu ba tribunal atu fo pena prizaun fulan neen ba arguido, tanba viola ona lei kodigu penal artigu 145 ho forma violensia domestika.
Iha fatin hanesan advogadu ba arguido nian la aseita ho alegasaun husi ministeriu publiku ne’e, razaun tanba arguido husu ona deskulpa ba vitima no foin primeira vez arguido halo aktu ne’e hasoru vitima, tanba ne’e husu atu fo pena administrasaun deit ba arguido.
Entaun ikus mai juis prezidente deside fo pena prizaun tinan ida suspende ba tinan ida, no husu ba arguido atu labele repete tan aktu hanesan iha future.