Polisia Nain 114 Pasa Teste atu tuir formasaun Sarjentu iha Akademia Polisia

Membrus Polisia Nasional Timor-Leste (PNTL) hamutuk 108 inklui nain neen (6) husi Guine Bissau no Sao Tome Principe nasaun membru Comunidade Paizes da Lingua Portugues (CPLP) mak pasa ona teste atu bele tuir formasaun ba kargu sarjentu polisia nian.

Segundu Komandante Jeral PNTL, Komisariu Faustino da Costa hateten, sira nain 114 ne’e sei tuir formasaun iha Sentru Formasaun Akademia Polisia durante fulan sia.

“Sira sei aprende kona ba profesionalidade servisu no oinsa sai lideransa ne’ebe diak,” Komisariu da Costa hateten, iha Dili.

Alende aumenta nivel konesementu iha area lideransa nian, nia hateten sira mos sei estuda kona ba teknikus jerais sira ne’ebe relasiona ho instituisaun polisia nian.

Husi numeru ne’e, nia informa iha membru polisia feto nain 14 mak pasa teste ne’e no wainhira kompleta ho sussessu sei sai mos sargentu.

Nia hateten, iha tinan ida (2016) ne’e komando PNTL no governu loke opportunidade ba pais CPLP sira konkore iha vaga ne’e, tanba PNTL mak agora dadaun xefia hela polisia CPLP, inklui Ministerio interior CPLP e Ministerio Administrasaun Interna CPLP.

Iha parte seluk konkorente Fatima Maria Martins Marques, sente urgullho tanba  polisia feto hamutuk 14 mak pasa testes ne’e.

Nia konta, test ne’ebe mak husi parte instituisaun fo ba sira mos la fasil, etapa pur etapa no ho transparansia.

“Test ekrita, fiziku maibe hau urgulho tanba bele pasa no hau promete sei aproveita formasaun ne’e ho diak hodi bele sai polisia ne’ebe diak liu tan,” nia hateten.