- Publika iha: 26 Abril 2017
Polisia Nasional Timor –Leste kaptura ona autor prinsipal ba kazu omisidu organizadu ne’ebe hakoi ho kondisaun moris vitima iha suku Uai-Bobo, postu admnistrativu Ossu, munisipiu Viqueque.
Komandante polisia munisipiu Viqueque, Superintendente Antoninho Mau-Luta, hateten polisia kaptura autor ne’e iha suku Makadiki inisiu fulan Janeiru 2017 e agora kumpri hela prizaun preventive iha prizaun Becora.
Iha mos kronologia ba kazu ne’e rasik, nia konta katak vitima ne’e mestre ida, autor hakoi nia ho kondisaun tuur iha vitima nia uma kotuk rasik. Durante fulan hat ou lima hanesan ne’e vitima nia fen buka maibe buka la hetan. Depois de ida ne’e, la kleur vitima nia fen mos autor kaer tan tiha no hakoi moris deit ho ulun sai no taka ho aitahan.
Nia hatutan, autor ne’e hakoi vitima iha fulan Agostu e polisia hetan mate isin vitima nian ho nia fen iha 5 Novembru 2016.
“Hafoin akontesementu ne’e, autor halai tiha ba Makadiki, maibe ami halo operasaun nafatin to’o hetan no detein ona iha Becora,” nia hateten, iha Dili.
Enkuantu autor ba kazu ne’e, nia hateten polisia kaptura iha fulan Dezembru 2016 nia laran, tanba hetan partisipasaun maximu husi komunidade sira.
Iha parte seluk Membru Parlamentu (MP) David Diaz Ximenes apresia ho servisu polisi nian ne’ebe konsege kaptura ona autor ba kazu omisidu ne’e.
“Ita orgulho ho PNTL sira nia servisu ne’e, tanba wainhira sira bele kaptura suspeitu ba kazu ida ho fasil, entaun kriminozu sira sei tauk atu halo krimi,” nia orgulho.
Tanba ne’e, nia sujere ba polisia atu hametin nafatin relasaun diak ho komunidades hodi hetan informasaun ho fasil.
Nia espera, katak polisia mos bele kaptura suspeitu sira seluk ne’ebe konflito ho lei ne’ebe durante ne’e sei livre hela iha liur.
Nia fo ezemplu, hanesan ba kazu infantisida ne’ebe autor kuaze barak mak polisia seidauk kaptura inklui mos ba kazu omisidu balun.