Arguido Baku Lezada Tanba Dansa ho Mane Seluk

Mane (arguido) ida baku, tebe no tuku feto (lezada) iha festa laran tanba deit nia haree lezada dansa ho mane seluk.

Bazea ba akuzasaun husi Ministeriu Publiku (MP) ne’ebe sai husi juis prezidente, katak iha 20/09/2015 lezada ho arguido ba iha festa kazamentu no sira nain rua tuir malu foin fulan neen (6).
Iha festa laran, arguido hateten lezada atu labele dansa e iha altura ne’eba lezada hatan katak “sim hau mos lakohi atu dansa”, maibe wainhira to’o tempu divertimentu nian, lezada ba hasoru nia inan iha dapur hodi konta istoria.
Wainhira konta istoria hela, lezada nia primu rasik mai husu nia atu dansa, e husu primeiru vitima lakohi entaun primu ne’e ba dansa tiha ho feto seluk.
Hafoin muzika primeiru hotu, tama ba muzika ba dala rua lezada nia primu ne’e mai husu tan ba nia hodi dansa, entaun sente ladiak lezada hakat ona hodi ba dansa.
Depois dansa remata, arguido bolu kedas lezada hodi husu “o dehan la dansa maibe tanba sa mak o dansa”, maibe iha altura ne’eba lezada sente sala entaun nia nonok deit.
Tanba arguido koalia fali liafuan mal, entaun lezada hatan no mosu diskusaun, tanba nervozu entaun arguido baku tiha vitima.
Hafoin lee sai akuzasaun hirak ne’e, juis prezidente husu ba arguido atu hato’o nia deklarasaun maibe nia hili nonok hodi prova, katak akuzasaun hirak ne’e los hotu.
Iha tempu hanesan,juis prezidente husu ba lezada atu hato’o nia deklarasaun mai tribunal e nia konfesa katak agora sira nain rua kotu tiha ona (hapara relasaun domin) no sira nain rua mos diak malu ona.
“Ami para ona no ami agora diak malu ona,” nia dehan.
Hafoin rona deklarasaun hirak ne’e, juis prezidente deside fo pena administrativa ba arguido.