CCTV 3 Avaria Tiha Tanba Ahi Mate-Lakan

Segundu Komandante Jeral Polisia Nasional Timor –Leste (PNTL), Komisariu Faustino da Costa, afirma Circuite Camera Television (CCTV) ne’ebe kolokadu iha Dili laran, tolu komesa avaria kauze husi eletrisidade ne’ebe mate-lakan.

Nia hatete, funsionamentu CCTV depende ba eletrisidade, se ahi mate-lakan entaun fo impaktu bo’ot ba CCTV ne’e.
“Iha camera ida mak kuaze semana ida ona la lakan no rua seluk mos hanesan, tanba dalaruma ahi lakan tiha depois mate fali,” Komisariu Costa hateten, iha Dili.
Nia informa, CCTV iha parte Becora no tasi ibun mak avaria ona e komando hanoin hela oinsa mak bele atende situasaun ne’e.
Tanba tuir nia, CCTV ajuda tebes servisu polisia tranzito inklui servisu investigasaun kriminal nian hodi akompanha situasaun ne’ebe akontese iha terenu.
“Liu- liu iha parte kurzamentu sira, CCTV ne’e ajuda tebes hanesan iha asidente ruma, ita nia operador sira bele hetan kedas,” nia dehan.
Iha parte seluk Membru Komisaun B (seguransa, defeza, negosiu estrangeirus), Cesar Valente hatete governu presiza toma atensaun ba situasaun ne’e ho urjenti, tanba CCTV ne’e sosa ho folin karun.
Nia mos, sujere ba governu atu uza estavol nune’e wainhira ahi mate labele fo impaktu direitamente ba ekipamentus ne’e.
“Governu bele hadia ida ou rua ne’ebe mak aat ne’e, e sira seluk mos tenke tau kedas transformador para bele ajuda no garante estabilidade aparelu CCTV sira ne’e nia funsionamentu ba oin,” nia dehan.
Enkuantu CCTV ne’e PNTL monta iha Dili hanesan kapital nasuan ho kuantidade 70, balun hahu monta husi tinan 2016, no restu iha tinan ida ne’e (2017), CCTV ne’e rasik oferese husi governu Cina.