- Publika iha: 22 Agosto 2017
Komandante Polisia Munisipiu Dili, Euclides Belo hateten difikuldades ne’ebe durante ne’e Ofisial Polisia Suku (OPS) infrenta iha baze mak laiha fatin (ofisiu) hodi sira bele hala’o servisu ho diak.
Nia hateten, iha fatin balun autoridade local fo ona sira rai hodi halo uma ba OPS sira maibe to’o agora seidauk realize.
“Lolos ne’e, sira tenke iha ona ofisiu para bele servisu avontade iha suku laran,” nia hateten, iha Dili.
”Maibe ami servisu hamutuk ho xefe suku sira, sede suku balun oferese kuartu ida hodi OPS sir abele hala’o sira nia servisu iha baze, maibe balun mos seidauk.”
Entretantu Vise Diretor Fundasaun Mahein (FM), John Almeida hateten OPS nia prezensa importante tebes iha komunidade nia le’et.
“Sira ba hela no servisu hamutuk ho komunidade sira,” nia hateten.
Nia hateten, OPS sira halo servisu ho diak tanba husi komando fasilita ona sira ho motorizada inklui laptop hodi sir abele halo servisu ho diak liu tan iha baze.
Alende ne’e, nia hateten polisia suku la’os deit halo servisu suku maibe sira mos ba reforsa servisu eskuadra nian, tanba iha eskuadru balun membrus sei limitadu
“Entaun, dalaruma semana ida maid ala ida ou rua iha suku, tanba sira tenke ba apoia mos servisu iha eskuadra,” nia informa.
Iha parte seluk komunidade Kaikoli Rudolfo do Carmo, hateten servisu OPS iha suku Kaikoli diak ona, maibe sira nia fatin mak seidauk iha.
“Hau hanesan komunidade iha suku Kaikoli, husu ba governu tenke kria fatin ne’ebe fixu ba polisia komunitaria iha suku laran,” nia sujere.