- Publika iha: 06 Setembro 2017
Telekomunikasaun Telemor fasilita halo transmisaun direita (video call) ba Komandante Polisia Munisipal sira hodi hato’o relatoriu diariu ba Komandante Jeral kona ba situasuan en jeral, hahu hosi periudu ba kampanha eleitoral foin lais.
Liu husi transmisaun direita ne’e, Komandante Jeral PNTL, Komisariu Julio Hornai hateten komando bele rona no haree direitamente difikuldades no problemas ne’ebe komandante munisipiu sira infrenta iha baze.
“Rona direitamente saida mak sira halo, difikuldade saida mak sira hasoru,” nia hateten, iha Dili.
Liu husi transmisaun direita ne’e, nia informa komandante munisipiu sira hato’o relatoriu katak iha munisipiu balun akontese duni krimi.
Nia hateten, komando PNTL mos trasa hela planu atu koloka tan membru polisia iha fatin ne’ebe presiza prezensa polisia nian.
Iha parte seluk Manager Marketing Kompanhia Telekomunikasaun Telemor Nguyen Duc Binh-Roger, hateten fasilidade ne’e sira oferese gratuita ba PNTL hodi fasilita servisu seguransa nian iha baze.
“Ami apoia sira ho gratuita no governu la selu, fasilidade ne’e ami fo iha tempu kampanha no elisaun deit” nia hateten.