Kazu Oknum PNTL Involve iha Kampanha, Arkiva tiha ona

Kazu oknum Polisia ne’ebe maka involve iha kampanha Parlamentar, Instituisaun Polisia Nasional Timor-Leste (PNTL) deside arkivu tiha deit.

“tanba nia ba uza nia talenta hanesan ema artista, la’os lori naran instituisaun PNTL nian, e mos tanba nia hetan konvite husi komisaun orgainizadora,” hateten Segundu Komandante PNTL, Komisariu Afonso de Jesus, (05/07), iha Kaikoli, Dili.

Tuir nia, PNTL sei iha publikasaun formal ba rezultadu prosesu ba kazu ne’e, depois de eleisaun parlamentar.
Entertantu Deputadu Paulo Martins hateten, membru PNTL labele komete ba asaun hanesan ne’e, maibe nudar artista ne’e kestaun seluk ida ne’ebe presiza hare.

“Hau hanoin komandante iha medidas ida, atu aplika ba membru hotu-hotu ne’ebe maka la kumpri regras, maibe nia ba nudar artista no la lori institusaun nia naran ne’e kestaun seluk,” Deputadu Martins dehan.

Deputadu ne’e espera katak, Komando PNTL sei foti medidas ne’ebe maka diak, nune’e halo sira nia membru sira bele servisu ho profesionalismu liu tan.