Belo: Ema Sivil Utiliza Rama Ambon No Kilat Sei Prosesa Tuir Lei

Komandante Polisia Munisipiu Dili, Super-intendente Asisistente Euclides Belo hateten ema sivil sira ne’ebe durante ne’e uza sasan kroat (kilat no rama Ambon) hodi hakanek no halakon ema seluk nia vida sei prosesa tuir Lei No.5/2017 ne’ebe vigor.

Nia parte hato’o kestaun ne’e, relasiona ho joven ida ne’ebe foin lalais mate tanba hetan tiru ho kilat manu nian husi ema deskonesidu iha area Taibesi nian.
“Husi pontu de vista policia nian, katak ne’e kategoria kilat ne’ebe ba lei bandu, ne’e rigorozu e ami halo operasaun nafatin hodi bele rekolha hotu kilat sira ne’e, depois aprezenta ba Ministeriu Publiku hodi hato’o ba tribunal atu prosesa tuir lei ne’ebe iha,” Komandante Belo hateten, iha Dili.
Iha semana kotuk, nia dehan iha Comoro, iha suku Madohi komunidade balun ne’ebe durante ne’e sira rai kilat manu nian, voluntariamente entrega ba autoridade polisia nian.
“Ami husu ba publiku sira ne’ebe sei rai sasan ne’ebe mak ligadu ba funu nian ho ilegalmente, diak liu entrega ba polisia,” nia husu.
Sasan kroat (armas branka) sira hanesan katana, tudik, dima, rama Ambon ne’ebe Lei no.5/2017 bandu ona, entaun nia husu ba komunidade sira ne’ebe sei rai sasan hirak ne’e tenke entre ho voluntariu ba polisia.
Entretantu, Adjuntu Diretor Ezekutivu Fundasaun Mahein (FM), Joao Almeida hateten armas branka hanesan rama Ambon no sasan kroat seluk ne’e lei bandu tiha ona, tanba kuandu iha sidadaun balun kontra, tenke prosesa tuir lei ne’ebe iha.
“Lei no.5/2017 ne’e iha para atu regula sasan kroat sira hanesan ne’e, polisia tenke kaptura sira,” nia hateten.
Iha sorin seluk, Joventude Paul Sarmento husu ba joven sira atu hakmatek no labele involve aan iha krime ruma, tanba tempu agora la’os atu halo no buka problema.
“Tempu atu harii pas no establidade iha rai ida ne’e ,se ita jovens mak hatudu hahalok ida hanesan ne’e entaun ita nia futuru ba iha ne’ebe ,ita tenke hatene kuda dame no domin iha rai doben Timor,” nia apela.