Polisia Kaptura Jovens 139 Tanba Involve Iha Pratika Arte Ritual

Komando Polisia Munisipiu Dili liu husi Eskuadra Nain Feto, Forsa Rezerva ho apoia husi Servisu Informasuan PNTL nian inklui Forsa Defeza Timor-Leste kaptura joven nain 139 iha area Taibesi nian, tanba involve iha pratika arte ritual iha kalan bo’ot.

Komandante Poli-sia Munisipiu Dili, Superintendente Asistente Euclides Belo hateten joventude nain hira ne’e polisia kaptura bainhira sira halo hela arte ritual iha Taibesi.
“Ami halo kapturasaun joven nain 139 ne’e bainhira halo hela arte ritual iha tuku 8 kalan to’o tuku 4 madrugada,” nia hateten, iha Dili.
Husi nain 139 ne’e, nia informa iha feto nain neen (6) e maioria joven sira ne’e mai husi munisipiu Dili alende husi munisipiu sira seluk.
Razaun Polisia halo kapturasuan ba sira, nia dehan tanba pratika arte ritual ne’e parte ida husi hahalok krime ne’ebe regula ona iha lei no. 5/2017 kona ba armas branka alende rama Ambon, dima, kilat manu nian inklui pratika arte marsiais ne’ebe governu bandu tiha ona.
Nia informa, prosesu identifikasaun ba joven sira ne’e agora la’o hela no husi nain 139 ne’e, nain 10 mak minoridade.
“Ami fo hatene ba Polisia Komunitaria atu bele halo komunikasaun ho sira nia familia, lori sira nia sertidaun hatudu ba polisia atu justifiaka lolos sira ne’e minoridade ka la’e,” nia hateten.
Enkuantu, tuir kodigu penal labarik ho minoridade labele sujeitu ba prosesu e sira nia parte informa ona ba iha Ministeriu Publiku kona ba sira nain 10 ne’e.
“Sira ne’ebe minoridade ami entrega sira ba iha inan-aman, familia hodi eduka sira atu la’o tuir dalan ne’ebe loos, tuir atividades ne’ebe mak iha legalidade, nune’e labele prejudika sira nia future,” Komandante Belo hateten.
“Sira nain hira ne’ebe iha sela, ami fo apoia maxima no trata sira no tuir kriteria ne’ebe ami halo, tanba sira mak futuru nasaun nian.”
Entretantu Adjuntu Diretor Fundasaun Mahein (FM), Joao Almeida hateten pratika arte rituais ne’e viola no la halo tuir ona lei no regulamentu ne’ebe mak iha no bandu.
“Portanto ida ne’e mak polisia hola medida ida kaptura no detein hodi submete ba prosesu investigasaun,” nia hateten.
Portanto kazu ne’e, nia dehan polisia hato’o ona ba Ministeriu Publiku hodi prosesa tuir lei ne’ebe vigor iha Timor-Leste.
“Husu ba autoridade polisia tenke halo sosializasaun kona ba lei hirak ne’ebe regula kona ba atvidades arte marsiais no pratika arte rituais iha rai ida ne’e mak importante,” nia husu.