ME Bandu Profesores Voluntariu Hanorin Iha Eskola

Ministerio Edukasaun (ME) bandu eskola sira atu labele halo rekrutamentu ba professores voluntario sem autorizasaun husi ministerio.

Diretor Jeral Ministerio Edukasaun (ME), Antoninho Pires hateten iha ona sirkular ida governo estabelese desde 2013, katak laiha ona professores voluntario iha eskola, kuandu iha wainhira hetan aseitasaun husi Ministerio Edukasaun.
“Se laiha aseitasaun husi ministerio, sirkular ne’e ami implementa katak ami la rekonese,” DJ Pires hateten, iha Dili.
Se karik voluntario sira ne’e bolu malu deit hodi ba hanorin iha eskola mesmo ke eskola ne’e presiza, maibe nia dehan tenke hetan aseitasaun e konsentemento husi Ministerio Edukasaun.
Apartir 2013, sirkular ne’e iha ona hahu husi 2014-2016 mak tama iha eskola ne’e hetan surat husi ministerio ka lae, se la hetan husi ministerio sei la rekonese.
Entretantu Sekretario Nasional rede edukasaun Timor-Leste Coalition for Education (TLCE), Jose Monteiro hateten Ministerio Edukasaun bandu maibe realidade iha kampu oin seluk, tanba eskola balun sei menus profesores hodi kompleta material balun.
“Diretor eskola bolu deit, tanba dala ruma nia iha kapasidade atu rekruta professor kontratado,” nia hateten.
Nia hateten, tuir lolos diretor eskola ne’e nia funsaun atu halo jestaun ba eskola, la’os halo rekrutamento professors, ne’e governu nia kompetensia.
“Maibe ita mos tenke rekonese, katak eskola balun sei menus professor, sira presiza tan professor,” nia hateten.
Tanba ne’e, nia dehan Ministerio Edukasaun tenke konsulta hamutuk ho parseiro sira hodi haree ba situasaun ne’e, atu bele resolve.