Polisia Bandu Motoristas Koalia Telfone Bainhira Lori Hela Kareta no Motor

Komandante Polisia Munisipiu Dili, Superintendente Asistente Euclides Belo husu ba motorista sira hotu atu labele uza telefones durante halo movimentu iha estrada hodi prevene asidente trafiku.

Tanba tuir nia, simu ga koalia telefone bainhira lori hela motor ga kareta bele hamosu asidente trafiku ne’ebe la espera.
“Hakarak simu telefone tenke para kareta iha fatin ne’ebe propriu, nune’e labele kontra regras tranzito nian,” Komandante Belo husu, iha Dili.
Depois hotu mak, nia dehan bele halo fali viagen, atu nune’e labele atrapalha hodi labele akontese asidente iha dalan.
“Iha operasaun Polisia Tranzitu nian mak haree ga hetan sira tau telefone iha tilun, ami sei kaptura hodi foti medidas ba sira,” Komandante Belo hateten, iha Dili.
Nia hateten, hahalok simu ga koalia telefone labele tolera kuandu halai hela kareta no motor. “Ita nia hanoin ne’e fahe ba rua, ida hanoin fo informasaun ba ema iha telefone ne’e no ida seluk hanoin atu fahe kareta tuir dalan ba ita nia diresaun,” nia hateten.
“Hau husu ba publiku tomak, kuandu haree motorista se deit mak ho kareta, motor la’o iha dalan publiku mak telephone iha tilun no haree katak ida ne’e fo perigo ba ema seluk nia viagen, kontakto lalais no foti nomor plat atu ami bele foti medida,” nia sujere.
Nia hateten, labele tolera hahalok ida ne’e tanba capital Dili kada semana, kada fulan no tinan ema sosa kareta no motor barak, entaun ema hotu ne’ebe lori motor no kareta iha estrada tenke kumpri regras ne’ebe iha.
Bele mos, nia dehan fo ameasa ba estudante sira ne’ebe ba eskola atraveza iha zebra cross no bele soke sira iha ne’eba inklui mos ema la’o ain sira seluk.
Iha sorin seluk Motorista Domingos Saldanha konkorda katak ida ne’e la diak tanba wainhira lori hela kareta labele koalia ka simu telefone.
“Ita nia konsentrasaun lalos tanba ita atrapanla hela ho telefone, ne’e ita la fokus ona, ida ne’e bele prejudika ema nia vida,” nia hateten..
Tanba ne’e, nia aseita katak labele atrapalha ho telefone kuandu lori hela kareta ga motor bainhira halo movimentu iha estrada.