- Publika iha: 20 Dezembro 2017
Komandante Polisia Munisipiu Dili, Superintendente Asistente Euclides Belo husu ba kondutor sira hotu tantu mikrolet no bis sira ne’ebe halo operasaun iha dalan publiku atu kumpri regras tranzitu nian bainhira halo operasaun tula pasajeirus.
Nia hateten operasaun rigorozu ne’e hahu kedas iha loron 1 Dezembru hodi kontrola kondutores ne’ebe ulun to’os hodi ignora tiha regras tranzitu ne’ebe iha, liu-liu sira ne’ebe lori pasajeirus liu estandar.
“Hakarak ka lakoi, tenke obriga sira disiplinha lori passajeirus husi Dili sai ba distrito,nune’e mos husi distrito mai Dili para sira disiplinha,” Komandante Belo hateten, iha Dili.
“Ami kaptura ona sira balun bainhira ami nia ekipa halo operasaun iha area Cristo Rei nian, sidade laran parte leste, oeste inklui iha Tasi tolu nian”
Ba sira ne’ebe kontra regras, nia hateten polisia sei prende sira nia kareta ga motor hodi foti medida ba sira, eduka sira. Sira barak mak kompriende lei maibe rohan deit.
“Ohin rona no kumpri maibe aban fali laiha ona, entaun ita eduka sira,” nia dehan.
Nia hateten, polisia prende kareta hamutuk 11 tanba balun dokumentus laiha, balun kontra regras no la tuir targetu operasaun nian.
“Ita prende sira fo medida ba sira tuir tabela infrasaun ne’ebe mak ita iha atu sira bele kumpri multa tuir folin ne’ebe mak hakerek ona iha tabela ne’e e polisia la inventa no iha tabela ne’e klaru tia ona,” nia informa.
Nia husu, ba transporte nain sira tenke mai lalais foti bileti infrasaun, selu lalais para foti kareta, se la’e kuando para kleur iha ne’e multa sei sa’e tan.
Iha parte seluk, Kondutor Marcal dos Santos hateten kareta ne’ebe polisia prende ne’e tanba kondutor balun la uza farda no la halo tuir regras e balun dokumentos laiha.
“Ami kondutor mak seidauk iha konsiensia hodi viola regras ne’ebe iha ona,” nia dehan.
Maibe, nia mos hateten sira sei kumpri regras hotu ne’ebe mak polisia aplika no mos sei selu multa tuir tabela infrasaun ne’ebe mak iha.