Bee Tama Edifisiu Polisia Eskuadra Comoro, Estraga Dokumentus Vital

Kada tinan bainhira udan monu rai, edifisiu Polisia Eskuadra Comoro, Postu Administrativu Dom Aleixo sempre bee nalihun no bee to’o tama ba edifisiu laran hodi estraga dokumentus importante sira.

Komandante Polisia Mu-nisipiu Dili, Superintendete Asistente Euclides Belo rekonese katak udan durante loron rua ne’ebe akontese konsege estraga dokumentus importante balun ne’ebe rai iha ne’eba, portantu balun ne’ebe rai iha elektroniku (komputador) ne’e seguru.
“Ami nia eskudra Dom Aleixo ne’e, kuandu udan bo’ot ne’e ami tenke ser fo atensaun tebes tanba dokumentus balun rai iha ne’eba,” Komandante Belo hateten, iha Dili.
Nia hatutan, udan ne’e natureza no komando labele halo milagre lalais hodi halo edifisiu foun, maibe tama ona iha planu komando nian.
“Ami iha planu asaun komandu PNTL nian iha ona katak eskuadra ne’e sei halo tempu oin mai,” nia hateten.
Kona ba dokumentus ne’ebe hetan estragus, nia dehan nia arkivu iha hela, portantu aguarda nafatin.
“Ami orienta ona komando eskuadra para tau matan nafatin ba ita nia dokumentus sira ne’e,” nia informa.
Maske iha bee laran, maibe nia dehan sira nafatin prontu atu servi. “Ami espera katak tinan ida ne’e ami nia prosesu atu harii edifisiu eskuadra Dom Aleixo ne’e la’o ho diak,” nia esperansa.
Entretantu tuir obs-ervasuan Komunidade Aim-utin Higino da Costa Nunes, nian katak edifisiu Polisia Eskuadra Comoro ne’e bainhira udan, bee sempre nalihun, ida ne’e difikulta sira nia servisu.
“No mos bele estraga sira nia sasan ne’ebe mak iha laran tanba bee nakonu iha liur, entaun laran ne’e mos tama hotu,” nia dehan.