Kompania Dili Aero Sosa Aviaun Ida Ba F-FDTL

Kompania Dili Aero ho insiativa rasik sosa aviaun ho modelu Sestas 172P ba Falintil-Forsa Defeza Timor Leste (F-FDTL) hodi uza ba kontrola tasi Timor nian.

Diretor Kompania Dili Aero, Lorenco de Oliveira hatete kompaña asina ona Memorandum of Understanding(MoU) ida hodi sosa aviaun ho modelu 172p ba Forsa Defesa Timor-Leste (F-FDTL) hodi kontrola riku soin iha tasi Timor.
“Tanba ita nia riku soin barak iha tasi kuaze ema foti hotu, ho ida ne’e mak kompania haree katak atu kobre tasi Timor tomak ho roo deit susar, sira presiza duni aviaun hodi halo vijilansia,” Diretor Oliveira hateten, iha Dili.
Nia hateten, aviaun ne’e sosa husi Estadu Unidus da America (EUA) ho presu $300 mil resin ho modelu Sestas 172P, e agora aviaun iha ona dalan no sei to’o iha Timor iha loron 19 fulan Fevereiru tinan ne’e.
Portantu aviaun ne’e, nia dehan sira bele ona utiliza iha Abril halo operasuan kontrola tasi Timor husi ema na’ok teen sira labele foti riku soin Timor nian iha tasi laran.
Maibe antes ne’e, nia hateten sira sei haruka pilotu nain hat (ne’ebe preparadu) ba tuir formasaun, nune’e sira bele responsabiliza no halo operasaun bainhira aviaun ne’e to’o mai Timor.
“Pilotu nain hat ne’e sei ba tuir fali formasaun iha Filipina, alende ne’e sira ba atu hamoris fali sira nia lisensa lori aviaun nian, tanba sira nia lisensa mate ona,” nia hateten.
“Nasaun barak mak uza ona aviaun hodi halo patrulha, e ida ne’e la’os buat bo’o ida, maibe buat ki’ik ida no ita tenke ser komesa, se la komesa agora bainhira tan.”
Nia dehan, kompania iha responsabilidade atu haruka pilotu ba tuir formasaun kona ba aviaun helikoptru nian inklui mekaniku ba F-FDTL.
Enkuantu Ministru Defeza no Seguransa (MDS), Jose Agustinho Sequeira Somotxo hateten, neé hanesan kooperasaun entre ministeriu ho Kompania Aero Dili no Aero Flyer, ho objetivu mak atu atualiza fali pilotu sira neébe simu ona formasaun iha Filipina durante tinan lima.
“Ho biban ida ne’e Aero Dili no Aero Flyer ho Ministeriu Defeza no Seguransa, aproveita pilotu sira ne’ebe paradu ona durante tinan lima hodi atualiza sira, aprende fila-fali,” nia hateten.
Ho ida ne’e mak, nia dehan Ministerio Defeza no Seguransa asina MoU ida ho Kompania Dili Aero ho Aero Flyer hodi sosa aviaun ho modelo sestas 172P ba F-FDTL, ajuda sira kontrola tasi Timor.