- Publika iha: 30 Janeiro 2018
Durante tinan 2017, Polisia Maritima konsege kaptura sidadaun Alor –Indonesia nain rua (feto ida -mane ida) ne’ebe koko tama mai rai laran ho illegal.
Adjunto Komandante Uniaun Polisia Maritima, Joao Cesar da Silva hateten sira nain rua ne’e fen- la’en, sira husi Alor ho bero mai iha Com-Lospalos, depois posto Comando Uniaun Polisia Maritima ida iha ne’eba hetan no kaptura no lori mai Dili.
“Ami foti atu intrega, koordena ho embaixada Indonesia hodi intrega ba Serviso Imigrasaun hodi kontinua prosesu ne’e hodi halo deportasaun fali ba sira nia fatin origin Alor,” nia hateten, iha Dili
Nia hateten, prosesu kona ba kazu ne’e la’o ho diak no sira fila ba fatin origin ne’e akompanha husi Uniau Polisia Maritima, membro husi Embaixada Indonesia nain ida.
Nia dehan, sira nain rua ne’e halai mai Timor tanba sira iha problema ida ne’e mak sira halai sai mai iha ne’e para asegura seguransa ba sira.
Alende ne’e, nia dehan iha mos konpania Hon Long iha roo 15 ne’ebe mak halo peskas sira kaptura fali ikan tubaraun ida no agora dadaun ne’e roo hirak ne’e para hela iha area Metiaut, hodi hein desizaun ikus husi Ministerio Publiku.
Entretanto, Membro Palramento husi Comisaun B, Jacinto Viegas hateten durante ne’e Polisia Maritima esforso halo sira nia serviso mesmo ho fasilidade ne’ebe la sufsiente, maibe sira la tau kestaun ba ida ne’e, sira uza buat ne’ebe iha hodi halo serviso.
“Ita haree, katak sira iha duni antusiasmu atu halo serviso tuir sira nia knar no fasilidade ladun premite ba sira maibe sira halo serviso diak,” MP Viegas dehan.
Tanba sira halo duni serviso maritima nia ho diak no kontrola riku soin sira ne’ebe iha Tasi atu nune’e ema seluk labele foti.