Governu Nomeia Eis II Komandante PNTL Sai Adidu Seguransa Iha Australia

Governu liu husi Ministeriu Defeza e Seguransa no Ministeriu Negosiu Estranjeirus e Kooperasaun nomeia eis II Komandante Polisia Nasional Timor-Leste, Afonso de Jesus sai adido seguransa Timor-Leste nian ba Australia.

Komandante Jeral PNTL, Komisariu Julio Hornai hateten eis II Komandante PNTL ne’e sei hala’o nia misaun foun nudar adidu seguransa iha Australia durante tinan tolu nia laran.
“Primeira vez instituisaun PNTL nomea nia sai adido apezar iha Australia, atu nune’e bele haree problema sira ne’ebe mak ita nia sidadaun sira iha ne’eba hasoru,” Komisario Hornai hateten, iha Dili.
Entretantu eis II Komandante PNTL ne’ebe nomeado sai adido seguransa iha Australia, Afonso de Jesus hateten nudar servidor estado nia pronto atu hala’o misaun foun ne’ebe mak estadu fo fiar ba.
“Hau sei hala’o hau nia misaun foun nudar adido seguransa ba Australia durante tinan tolu,” nia hateten.
Nia mos, agradese ba Ministeriu Defeza e Seguransa (MDS) no Ministeriu Negosiu Estranjeirus e Kooperasuan (MNEK) ne’ebe fo ona oportunidade no konfiansa ba Instituisaun PNTL, liu-liu ba nia aan hodi hala’o misaun ida ne’e.
“Hau hanoin ida ne’e oportunidade ida ne’ebe mak diak hodi bele motiva instituisaun PNTL ne’ebe preparadu, governo bele hili hodi tau tan adidu iha fatin ne’ebe deit, hodi ita bele iha koopersaun bilateral, liu-liu ba asuntu seguransa iha nasaun ne’ebe mak ita nia ema hela barak ba,” nia hateten.
Alende ne’e, nia dehan membrus PNTL mos preparadu intermus skills iha lian Portugues inklui mos Inglesh, iha membru barak mak hatene koalia lian rua ne’e.