Polisia Tranzitu Prende Motor Ilegal Hamutuk 50

Durante tinan 2011 to’o fulan Janeiru- Maiu 2012, Polisia Nasional Tranzitu (PNT) konsege prende motorizada illegal ne’ebe halo sirkulasaun iha capital Dili hamutuk 50.

“Kuandu ami prende motor maka sira la mai foti entaun ami bele hatene ona katak ne’e motor illegal no laiha surat, tanba kuandu ami prende ami haruka sira ba foti dokumentus,” hateten Komandante Tranzitu Nasional, Inspektor Xefe Antonio L.C.Soares, (24/07), iha Kaikoli, Dili.

Tuir nia, wainhira kuandu motor nain la mai foti, PNT sei entrega ba Ministeriu Publiku atu halo notifikasaun hodi Lelaun tiha, fo ba Governu atu fasilita halo servisu ba interese nasional nian.
Entertantu tuir Deputadu Aderito Hugo katak,motor illegal mosu tanba komunidade barak mak gosta ba sosa motor iha area fronteira.

“Tinan sanulu ukun an transaksi illegal iha area fronteira buras, e ida ne’e la’os surpreza ba ita kuandu polisia tranzitu prende motor illegal,” dehan Deputadu Hugo.

Tanba ne’e atu prevene labele akontese transaksi illegal iha fronteira, Polisia Fronteira tenke halo servisu ho kualidade.