SIC Hahu Halo Investigasaun Ba Kazu Omisidu Vitima MP

Agora dadaun Polisia liu husi Servisu Investigasaun Kriminal (SIC) hahu halo investigasaun ba kazu omisidu ba Vitima MP ne’ebe diskunfia oho husi nia doben ho inisial JC, iha Apartemen Paradise Malinamuk, Kampung Baru, Comoro, Dili.

“Hau hanoin katak kazu ne’e murni ema oho, vitima ne’e naran Marcelina Pereira, nia mate iha Apartemen Paradise Malinamuk iha Kampung Baru ne’eba, e prosesu investigasaun la’o hela,” dehan Diretor SIC, Xefe Calisto Gonzaga, foin lalais iha Kaikoli, Dili.
Diretor SIC dehan, kazu ne’e akontese iha dia 12 Julhu fulan kotuk, iha tempu ne’eba kalan, suspeitu ba tula vitima iha nia uma, ho intensaun atu la’o halimar, maibe ikus mai familia vitima rona fali vitima mate tiha no suspeitu husik hela mate isin iha apartemen paradise nia oin.

Mate isin MP rasik hetan husi apartemen nain iha tempu dadersan, hafoin ne’e nia telephone kedas ba polisia. E suspeitu JC agora provizoriumente iha prizaun preventive Becora, Dili hodi hein prosesu legal iha tribunal.

Entertantu Membru Parlamentu Nasional Deputada Virginia Ana Belo hateten, ne’e krimi , ne’e duni husu ba Instituisaun relevante atu investiga didiak no kondena arguidu tuir lei haruka.

“Hau hanoin  ne’e krimi ida, tanba ema ida laiha direitu atu foti ema ida nia vida ne’e ita nia konstitusaun garante ida ne’e, tenke prosesu ema ne’e tuir lei ne’e haruka,” dehan Deputada Belo.
Deputada ne’e mos husu ba joven feto sira wainhira namora ou hetan namoradu ruma, tenki hatene los mane ne’e, no tenke iha sentimentu atu proteze an rasik.