- Publika iha: 17 Outubro 2023
Guarda Nacional Republicana (GNR), husi Portugal, fasilita formasaun espesífiku kona-ba seguransa ambientál ba membru Polísia Nasional Timor-Leste (PNTL) humutuk na’in 26.
Komandante Jerál PNTL, Komisáriu Henrique da Costa dehan, PNTL iha misaun hodi defende legalidade demokrátika no garante seguransa ba ema, no salva guarda no defende direitu sidadaun sira-nain.
"Tanba ne'e ohin ita-nia parseru Guarda Nacional Republicana GNR fasilita formasaun espesífiku kona-ba seguransa ambientál ba ita-nia membru hamutuk 26, hodi hasa'e sira-nia kapasidade oinsa halo protesaun ba ambiente," nia dehan.
Nia dehan, formasaun ida ne'e foin realiza primeira-vés iha instituisaun PNTL, ida-ne'e importante tebes atu nune'e sira bele hala'o funsaun kona-ba salva guarda no halo protesaun ba ambiente hamutuk ho florestál sira.
"Ita espera katak formasaun espesífiku kona-ba protesaun ambientál ne'e bele sai susesu nune'e depois de formasaun durante fulan 3 ne'e sira bele hala'o misaun hodi apoiu fó protesaun ba ambiente," Komandate Costa dehan.
Nia dehan asuntu protesaun ambientál ne'e importante tebes, tanba liuhusi ambiente mak bele fó moris ema liuhusi is, hahan, bee no materiál seluk ne'e ema uza hodi moris loro-loron.
"Ambiente oferese rekursu hotu ba ita-nia sobre vivénsia, atu buat hirak ne'e kontinua ita tenke fó protesaun ba ambiente," nia hatete.
Tanba ne'e nia dehan, membru na’in 26 ne’ebé partisipa iha formasaun ne'e sei sai hanesan unidade ida iha instituisaun PNTL no sei dezenvolve iha teritóriu laran tomak hodi apoiu fó protesaun ba ambiente.
Iha fatin hanesan, Reprezentante Embaixada Portugal iha Timor-Leste, Coronel Moreira dehan, formasaun kona-ba oinsa fó protesaun ba ambiente, tanba polísia iha mós misaun importante ida hodi fó seguransa ba ambiente.
"GNR apoiu kapasitasaun ba membru polísia hirak ne'e, nune'e mós apoiu estabelese unidade Guarda Ambientál iha instituisaun PNTL," nia informa.
Nia dehan, dezenvolvimentu polísia la’ós haree de’it ba fó seguransa ba komunidade nune'e mós membru governu sira maibé iha mós misaun importante ida kona-ba fó segusansa ba ambiente, asuntu sira ne’ebé kontribui ba dezenvolvimentu nasaun tenke envolve parte seguransa nian.