Kadet F-FDTL Praça ne’ebe tuir formasaun, na’in ida ilegal

Tanba failansu husi komisaun rekrutamentu, kadet Forsa Defeza Timor-leste (F-FDTL) Praça nain ida ho ilegalmente tuir formasaun military nian iha Sentru Formasaun Metinaro hodi okupa kandidatu seluk nia fatin.
“Kandidatu illegal ne’e konsege tama iha sentru formasaun Metinaro no tuir treinamentu, e ida ne’e akontese tanba bainhira bolu naran atu sa’e kareta ami la halo konfirmasaun didiak hanesan dokumentus ne’ebe sira hatama e ami bolu naran tuir lista ne’ebe iha, entaun bainhira ami bolu kandidatu illegal ne’e aproveita foti liman no hatan hodi ba sa’e kareta, hodi lori ba iha sentru formasaun Metinaro iha 30 Agustu foin lalais ne’e,”hateten Diretor Jeral Sekretariu Estadu Defeza (SED), Joao Corte-real, semana kotuk (01/09) iha Palasiu Governu,Dili.
Tuir nia,kandidatu illegal ne’e foin identifika iha 01 Setembru,hafoin kandidatu ne’ebe pasa iha selesaun ba hato’o reklamasaun iha komisaun rekrutamentu nian.
“Bazea ba reklamasaun ne’e, komisaun kontaktu kedas ba iha sentru treinamentu Metinaro hodi konfirma kandidatu illegal ne’e e agora haruka fila tiha no kandidatu ne’ebe pasa iha selesaun ne’e loron ne’e kedas tama iha sentru formasaun hodi tuir treinamentu military nian,”nia esplika.
Komisaun rekonese katak ne’e failansu husi komisaun nian tanba la halo konfirmasaun kandidatu ida-ida tuir dokumentus ne’ebe sira hatama.
“maibe akontese mos tanba mudansa orariu tama sentru formasaun ne’ebe lolos tama hamutuk hotu ho ofisiais sira iha fulan Maiu,”nia dehan tan.
Alende ne’e iha loron ne’ebe hanesan 01/09,iha joven nain 7 mak mai hato’o sira nia reklmasaun ba iha komisaun rekrutamentu tanba  sira la satisfas ho rezultadu teste  mediku, psikolojia no fiziku ne’ebe la fo sai husi komisaun.
“Iha lista ne’ebe komisaun fo sai no taka iha kuadru avizu iha distritu hotu, ami nia naran iha tanba ne’e iha 30 Agustu ne’e ami mai hotu , maibe bainhira bolu naran ami nia naran laiha fali, tanba ne’e ami mai iha ne’e ho razaun saida mak ami nia naran laiha,” protesta Tome Freitas nudar reprezenta husi joven nain 7 ne’ebe naran laiha lista.
Joven na’in 7 ne’e mak, Calistro Gama (Baucau), Alfredo de Jesus Perreira (Ainaro), Leopoldinho de Araujo (Ainaro), Tome Freitas (Dili), Patricio Ximenes Bento (Manatuto) Moizes da Conceção Soares (Dili), no Umbelino Jelo do Rosario (Dili).
Hatan ba kestaun ne’e, Joao Corte-real hateten, joven nain 7 ne’e balu la liu iha selesaun dokumentus, balu iha teste mediku, psikolojia-mental, no balu iha fiziku. “Informasaun ne’ebe hateten katak sira nain 7 nia naran sai no taka iha kuadru avizu iha distritu, ne’e la los,”Joao dehan.
Kona-ba sira reklamasaun,komisaun simu tiha ona no hato’o ona ba iha SED Julio Tomas Pinto maibe seidauk iha despaixu.