Prezidente KFP Pereira: labele uza Patrimonio Estadu ba halo aktividade partidaria

Prezidente Komisaun Funsaun Publika (KFP), Liborio Pereira, husu ba funsionario publiku sira para labele uza patrimonio estadu ba aktividade politico tamba Lei Funsaun Publika Numeru 8, iha artigu 45 kona ba Kodigo Etika Funsau Publika, bandu ida ne’e.

“Hau sei husu ba Director Jeral sira ne’ebe hakarak tuir kampanha jeral tenki husi lisensa espesial sein vensimentu atu nune’e labele lori atributu funsaun publiko ninian ba halo aktividade partidaria ne’e,” hateten Prezidente KFP, semana kotuk (16/12) iha Dili Convention Center, Dili.
Tuir Prezidente KFP mos katak  iha Dekreto Lei Numeru 8/2003 no Lei ne’e forte ona mas nia kontrolu iha instituisaun mak seidauk iha.

“Buat balun ne’e dala ruma Komisaun Funsaun Publiko deteta ona tenki prepara didiak iha 2012. Primeiru ita sei hahu ho kareta sira ne’ebe matrikula fila tun fila sae lori tinta mutin pinta tiha G fali 0. Ne’e hotu atitude irresponsablidade individu balun nian,” haktuir Prezidente KFP Pereira.

Nia hateten mos katak iha tinan foun sei iha kordenasaun daik lui tan ho Diresaun Nasional Transporte Terestres (DNTT) tanba kontrola patrimonio Estady liu liu kareta lao sira nia resonsabilidade no iha parte seluk Polisia Tranzitu sei halo kordenasaun ne’e hodi tau matan para bele rezolve no prevene ka redus irregularidade kona ba utilizasaun patrimonio estadu ba fali interese partidaria.

Entretantu Komisariu Adjuntu, KOmisaun Anti Korrupsaun (KAK), Jose De Jesus Das Neves, hateten mos katak sira sei halo operasaun ba Patrimonio Estadu liu liu transporte inklui mos mina.
“Ida ne’e iha relatorio ida atu haruka ba Ministerio sira hotu ba Directoras no mos directores sira hotu atu bele hanoin oinsa mak hamoris mekanismo internal para kontrola utiliza patrimonio Estadu nian ho sala,” hateten Adjuntu Neves.