Atu hetan Karta Kondusaun SIM tenki tuir uluk formasaun hosi DNTT

Bazeia ba Despaixu No 4, Diresaun Nasional Transportes Terrestres (DNTT), Marsu 2011, hosi loron 1 Abril 2011 ema ne’ebe atu hetan karta kondusaun, kareta no motor, tenki tuir worshop formasaun durante loron rua no kompleta ho susessu atu bele tuir ezame eskrita no oral no molok bele pratika lori kareta ka motor iha terreno.
“Buat ne’ebe ami halo especial deit ba ema Timoroan maibe ema Estrangeiru ne’ebe hakarak tuir bele. Ami la obriga tamba kurikulum ba ezame ho lian tetun deit,” hateten Xefe Interino Administrasaun Carta Kondusaun nian Eugenio da C.de A Do Rego iha nia knar fatin DNTT, Balide, iha Dili.

Tuir Xefe Interino do Rego katak bainhira remata ona worshop durante loron rua partisipantes hetan ona certifikadu atu bele tuir mai tuir ezame eskrita, oral no pratika ona iha kampu.
Iha Timor-Leste kriteria kona ba se-se mak bele hetan karta konduzaun ma sidadaun hotu ho tinan 17 anos ba leten. Ba joven tinan 16 atu bele hetan karta kondusaun motor tenki hetan autorizasaun hosi inan-aman.

Iha parte seluk Eugenia da Luz nudar joventude husi Distritu Baucau hateten katak Governo halo hanesan ne’e diak duni atu nune’e ema kondutor sira bele kumpri saida mak husi DNTT fo sai.

“Tamba dala ruma sira ne’ebe laiha sim kaer kareta no motor sira arbiru deit no dala ruma Polisi mos tenki tilan sira tamba laiha karta kondusaun,” hateten komunidade da Luz.
“Hau hare dala barak labarik ki’ik sira husi tinan 13 ba leten mos lori kareta no motor ida ne’e tamba sa mak husi DNTT fo autorizasaun ba labarik sira ne’e atu lori transporte sira ne’e. Husu ba DNTT atu labele fo SIM ba sira bainhira sira ba foti SIM,” hateten komunidade ba Luz.