- Publika iha: 30 Setembro 2011
Relasiona ho livrus ne’ebe sei menus iha eskola, obriga profesores sira buka rasik livrus nune’e bele hanorin alunus sira no prosesu aprendizajen kontinua la’o.
“Ami dala ruma tenke buka rasik livrus hodi hanorin estudante sira, dalaruma ami haruka alunus sira tenke hakerek tanba atu fahe ba estudante sira laiha, entaun tenke hakerek,”informa Bernardina de Sena Soares, profesora iha Eskola Primaria numeru 2 Bidau-Akadiru hun,semana kotuk (12/09) iha Bidau,Dili.
Nia hatutan, dalaruma buka rasik ne’e mos lahetan, entaun sira uza deit sira nia esperiensia ne’ebe iha hodi hanorin labarik sira.
“Ami dala ruma kalan labele toba tanba hanoin deit aban dader hanorin saida, entaun kalan ami tenke prepara materia e buka livru ne’ebe cocok duni atu hanorin estudante sira,”nia afirma.
Hatan ba kestaun ne’e Diretor Nasional do Curiculum e Avaliasaun Escolar Raimundo Jose Neto, katak livrus menus iha eskola la’os tanba Ministeriu la oferese maibe oferese livrus iha oin tolu, ba primeiru siklu, II siklu no terseiru siklu.
“Ba primeiru siclu (primaria) husi primeiru ano to’o setimo ano mak kurikulum iha hotu ona maibe livru mak sei falta disiplina tolu e disiplina hat mak iha ona,”Neto hateten.
Nia hatutan, disiplina tolu ne’ebe seidauk iha mak hanesan Lingua Tetun , Arte Muzikas , Educasaun Fisika Saude Higiene no disiplina 4 ne’ebe iha ona mak Lingua Portugues , Matematika , Estudu do Meio , Relijiaun Moral ( Relijiaun ida-ida fornese sira nia livrus).
“ Agora dadauk ami husi diresaun hamutuk ho aprovisionamentu prosesa hela livrus sira ne’e ba iha terseiru ciclo inklui mos segundo ciclo hein katak tinan oin mai livru sira ne’e iha hotu ona ba displina 11,”nia informa.
