- Publika iha: 25 Outubro 2011
Membru Parlamentu (MP) Paulo Martins, CNRT, foti assuntu no apela ba governu no autoridades kompetente atu investiga no toma medidas urjentes kona ba informasaun nia hetan katak foin daudauk deskonfia sidadaun Timoroan koko tama iha Darwin, Australia, ho osan $400 Mil iha nia pasta laran.
“Hau husu ba Governu ou Ministeriu ka Diretor sira, se ema ne’e funsionariu karik, Diretor, tenki hola medidas imediata, halo suspende kedas atu nune’e halo investigasaun,” hateten Deputado Martins iha Parlamentu Nasional, Dili, foin lalais (10/10).
Deputadu Martins hateten tan katak se karik ema ne’e Ministru ruma, Primeiru Ministru, ka se deit tenki hola medidas ida para suspende kedas Ministru ne’e para submete ba prosesu investigasaun.
Entertantu Deputada Fernanda Borges, PUN, hateten ema nebe lori osan $400 Mil ne’e sala husi Parlamentu Nasional hotu tanba se karik parlamentu aprova tiha Lei Money Laundry karik iha Aeroportu bele kaer toman ema ne’e.
“Tanba ita iha parlamentu la kohi halo ita nia servisu. Lei Money Laundry ne’e atu evita buat sira ne’e, tanba ema iha liur ne’e aplika regras sira ne’e ba ita,” hateten Deputada Borges.
Tuir Deputada Borges katak ne’e moe bo’ot ba Timor-Leste tanba ita rasik la kohi kontrola osan estadu ninian .
“Hau hakarak husu Ministru ida nebe mak halo ida ne’e, labele taka deit. Ita nasaun ida transparent,” haktuir tan Deputada Borges.
Nia husu tan katak Governu tenki esklarese lolos identidade ema ne’e tanba osan estadu ninian povu tenki hatene.
“La os ita koalia deit dehan ita hakarak kontrola korupsaun no kombate korupsaun maibe to’o ikus Ministru sira hamutuk mak halo fali ida ne’e, lori fali ba ema seluk nia rai, ema kontrola kaer tiha ita. Se mak moe, Estadu Timor-Leste mak moe.”
Entertantu Diretor Farming Study Group, hanesan mos membru Kor Group Transparancy, Remigio Laka Viera, husu ba Estadu Australia tenki fo fila osan $400 mil ba Estadu Timor-Leste.
“Tanba sa mak osan ne’e to’o $400 Mil Dolares Amerika sira bele lori ho cash [ossan] to’o tiha iha Australia neba,” Diretor Vieira husu. “Ita hanesan Cor Group transparency ejizi ba Governu alkansa lalais hodi halo karta ba Governu Australia bele foka sai se mak lori osan ne’e ba to’o iha Australia.”
Nia haktuir tan katak osan$400 Mil ne’e osan povu Agrikultura maioria ninian, labele lori tun, lori sae osan ne’e tuir sira nia hakarak. “Tanba sa mak la tau iha banku depois foti iha neba, tanba sa mak tenki tau iha pasta depois ema kaer.”
Diretor Vieira hateten tan katak informasaun ne’e nia rona husi Deputadu sira iha Parlamentu Nasional no mos bele hetan iha internet iha website Hadomi Timor.
“Tanba ne’e mak ita la bele husi koruptor sira ne’e. Ita husik nafatin, entaun povu Agrikultor sira mak sai vitima nafatin no mos dezenvolvimentu lao la fo dalan.”
