Parpol Sira La Dun Kampanha Kona ba Isu Joventude ho Desportu

Tuir observasaun komu-nidade nian ba atividade kampanha partidus politiku, nota katak kuaze ke partidu hotu ne’ebe avansa iha elisaun antisipada la hato’o sira nia programa kona ba joventude no asuntu desportu durante periodu kampanha.

Eis Sekretariu Estadu Joventude no Desportu, Leovigildo Hornai hateten asuntu joventude no desportu ne’e importante tebes e lolos kada partidu politiku sira tenke sita asuntu ida ne’e iha sira nia kampanha.
“Sira nia prespetiva, sira nia vizaun, metas ruma atu investe iha area joventude ho desportu ne’e saida, hau hanoin sira tenke koalia iha kampanha ne’e.”
Atu nune’e, nia dehan joventude sira ne’ebe kompleta ona tinan 17 ba leten bele vota ba partidu ida ne’ebe iha programa diak ba jovens sira nia future.
“Hau hakarak, sira aproveita hela semana ida ne’e bele fo solusaun ida imediata, politika sira nian ba asuntu joventude ho desportu nian molok tama ba elisaun,” nia esperansa.
Iha parte seluk Joventude Carlito Soares hateten partido politiku sira agora ne’e ba halo kampanha nunka koalia kona ba programa joventude ho desportu nian, enkuantu jerasaun foun mak nudar future nasaun nian.
“Tanba saida mak partidu politiku sira la tau prioridade asuntu joventude iha sira nia kampanha,” nia preokupa.
Alende ne’e, nia parte sente triste tanba asuntu depsortu ne’ebe mais importante ba future nasuan ida ne’e nian, maibe partidu politiku sira laiha programa kona ba area rua ne’e.
“Ema hotu iha mundu ohin loron gosta liu mak futebol, muzika no iha kompetisaun oi-oin deit iha area desportu nian,” nia dehan.