- Publika iha: 07 Julho 2012
Atu prevene mosu desintendementu durante prosesu eleisaun Parlamentar ne’ebe sei hala’o iha 07 Julhu tinan ne’e, jornalista sira tenke kumpri regras ne’ebe Sekretariadu Tekniku Administrasaun Eleitoral (STAE) fo ba sira.Tuir Transformador Informasaun STAE, Diane Almeida katak, la’os atu kontrola media sira halo kobertura, maibe iha lei kodigu konduta STAE nian,hatur ona katak oinsa mak bele regula komunikasaun social iha eleisaun prezidensial no parlamentar nian.
“Ida ne’e, oinsa mak ita bo’ot sira bele halo kobertura iha sentru votasaun,” hateten Transformador Almeida, (22/06), bainhira STAE halo briefing ho media sira, iha Kaikoli, Dili.
Nia esplika, iha loron eleisaun molok halo kobertura iha Sentru Votasaun ka Estasaun de Votu, no iha Asembleia Apuramentu Distrital no Nasional, jornalista tenke hetan autorizasaun husi Prezidente Sentru Votasaun.
“Ita bo’ot sira labele rekolha imajen no informasaun sira ne’ebe mak kompromete segredu votu,” Transformador Almeida esplika.
Entertantu Jornalista Diario Nasional, Deolindo Gusmao ne’ebe partisipa iha enkontru ne’e, sente kontente tanba ajuda nia atu hatene diak liu tan oinsa mak bele kobertura ba iha eleisaun parlamentar nian.
“Ami bele hatene klaru regulamentu kobertura iha sentru votasaun no estasaun de votu iha eleisaun Parlamentar nian,” Dehan Jornalista Gusmao.