Sentru Votasaun Suku Wailili, Distritu Baucau.Fiskais sira ne’ebe halo observasaun ba eleisaun lejislativu iha Sentru Votasaun balun, lamenta tebes ba atetude fiskais balun ne’ebe mak fasilita votantes sira ne’ebe matan aat, obriga sira tenke vota tuir sira (fiskais)  nia hakarak.

“Agora ferik katuas sira matan aat ne’e sira tur iha meja tu’u kuak tiha mak lori ba kabina de votus, lulun deit depois lori  ba hatama iha kaisa,” lamenta Fiskais Bernardino Gusmao, (07/07), iha Sentru Votasaun Suku Wailili, Distritu Baucau.
Tuir nia, iha ne’e Fiskais sira hatudu deit imajen partidu rua nian, enkuantu sira seluk la hatudu, lolos sira tenke hatudu, depois mak votantes sira deside atu hili ida ne’ebe.

Iha sorin seluk Lider lokal Partidu Fretilin nian ,Fernando Clau Soares Marques,  rezeita informasaun ida ne’e,tanba Brigada husi partidu hotu nian tama uma sai uma hanorin  tiha ona.

“Se matan labele hare, imi to’o iha sentru votasaun ou estasaun de votu imi sei husu,imi hakarak vota ba partidu ida ne’ebe imi sei husu fiskais sira fasilita tu’u iha brigada sira nia oin partidu ne’ebe mak sira hakarak,”hatete Lider Partidu Fretilin ne’e.

Tanba ne’e tuir nia, ida ne’e la’os fiskais sira mak obriga, maibe votantes sira mak deside, e fiskais sira tu’u tuir votantes sira nia hakarak.
“Ne’ebe informasaun ida ne’e lalos,” Lider Fretilin ne’e rezeita.