Bandu Parpol Involve Labarik Iha Kampanha

Komisaun Nasional ba Direitu Labarik (KNDL) husu ba Comisaun Nasional ba Elisaun atu kria regulamentu formal ida hodi bandu partidu politiku sira (Parpol) involve labarik iha sira nia atividade kampanha politiku.

Komisaria Maria Barreto, hateten sira koalia ona ho Comisaun Nasional ba Elisaun (CNE) atu konsidera no fo prioridade ba asuntu protesaun labarik, tanba labarik sira vulneravel tebes bainhira akontese violensia ruma. 

“Tenke iha regulamentu ida klaru kona ba protesaun labarik iha prosesu kampanha elisaun prezidensial no parlamentar nian, atu nune’e partidus politikus hotu konsidera no tau prirodade hodi fo protesaun ba labarik sira nia direitu durante kampanha,” nia hateten iha Farol, Dili. 

Nia dehan, regulamentu ida ne’ebe komprensivu tenke husu mos responsabilidade inan aman nian ba asuntu ida ne’e, tanba labarik balun mai ho familia. 

Nia dehan, rezultado monitorizasaun elisaun tinan hira liu ba hatudu partidus politiku sira mobiliza labarik fahe atributu partidus nian ba labarik sira hanesan faru, pamfletu hodi tuir kampanha. 

Iha rezultado ne’e, nia dehan hatudu mos katak labarik balun monu husi kareta durante hala’o pawai no partidu sein responsabiliza.  

Enkuantu komisaun rasik, nia hateten hahu halo sosializasaun hodi hasa’e konsiensia familia nian atu labele involve labarik iha atividade hirak ne’e tanba sira nia idade seidauk to’o atu tuir atividades partidus politiku nian. 

Tuir konstituisaun da republika ema ne’ebe iha direitu atu involve iha partidus politiku mak sira ne’ebe ho idade 17 ba leten, tanba sira iha ona direitu atu vota. 

Iha parte seluk, Koordenadora Partidu Fretilin munisipio Dili, Florentina Smith rekonese katak ida ne’e tanba falta  kontrolu ne’ebe masimu husi partidus politiku no familias e realidade  kampanha politiku durante ne’e labarik barak involve.

“Familia iha responsabilidade bo’ot tebes atu kontrola oan sira durante prosesu kampanha husi hahu to’o remata, tanba  bele mosu aktu violensia no dezastre ne’ebe afeta ba labarik sira nia vida,” nia hateten. 

“Importante polisia servisu hamutuk ho xefe sukus, avizu ba komunidades atu bandu labarik involve iha aktividade kampanha tanba risku bo’ot ba sira.”

Nia dehan, partisipa iha atividades (rame-rame) ne’e sai ona tradisaun Timor nian maibe ba atividades ne’ebe nakonu ho risku ne’e labele involve labarik.