- Publika iha: 27 Fevereiro 2017
Iha kandidatura nain walu mak konfirmadu no prontu konkore iha elisaun prezidensial ba periodu (2017-2022), tanba sira prienxe duni rekezitus ne’ebe iha, liu –liu apoiantes.
Diretor Sekretariadu Tekniku Administrasaun Eleitoral (STAE), Acilino Manuel Branco hateten sira iha koordenasaun ne’ebe diak tebes ho Tribunal Rekursu intermus halo verifikasaun ba lista apoiantes kandidatura ida –ida nian.
“Prosesu verifikasaun, iha duni kandidatu nain walu no ikus mai tribunal rekursu fo notifikasaun ba ami katak sira nain walu mak avansa ba elisaun iha loron 20 Marsu mai ne’e,” nia hateten iha konferensia imprensa iha STAE, Dili.
Kandidatu sira ne’e, mak hanesan Amorim Vieira, Antonio Maher, Antonio da Conçeicão, Francisco Guterres Lu-Olo, Jose Luis Guterres, Luis Alves Tilman, Angela Freitas no Jose Antonio Neves.
Husi nain walu ne’e, kandidatu Francisco Guterres Lu-Olo no Angela Freitas antes ne’e kompete ona iha elisaun prezidensial tinan 2012.
Tuir kalendario, kandidatu sira sei halo kampanha politika hahu dia 3 to’o 17 fulan Marsu 2017.
Enkuantu iha dia 24 Febreiru to’o 13 Marsu STAE hahu imprimi buletin de votus atu nune’e iha dia 15 Marsu sei transporta ba Australia no Portugal no loron tuir distribui ba munisipios sira.
Orsa ne’e dadaun, nia dehan sira halo servisu akreditasaun ba iha observadores nasional no internasional inklui mos media internasional no nasional sira.
Total eleitores ne’ebe sei partisipa iha elisaun prezidensial no parlamentar periodu ida ne’e mak hamutuk 747 mil resin (iha rai laran ) no 1332 iha rai liur.
Entretantu Primeiru Ministru, Rui Maria de Araujo apela ba funsionarios STAE atu hatudu sira nia profesionalismu ho imparsialidade iha prosesu elisaun prezidensial no parlamentar tinan ida ne’e.
“Hanesan sidadaun, ita ida –ida iha direitu atu hili kandidatu no partidu ne’ebe deit, maibe hanesan servidor estado ne’ebe servisu iha administrasaun eleitoral tenke hatudu imi nia profesionalismu, liu-liu hodi mantein rigor no imparsialidade iha imi nia servisu lor-loron,” nia apela.
Atu garantia imparsialidade iha prosesu tomak, nia husu ba orgaun estado ne’ebe servisu iha administrasaun eleitoral hanesan Comisaun Nasional Elisaun no STAE atu servisu tuir regras no metodu trabalho ne’ebe iha.