- Publika iha: 25 Abril 2018
Komandante Jeral Polisia Nasional Timor-Leste (PNTL), Komisario Julio da Costa Hornai informa katak seguransa ba elisaun antisipada iha 13 munisipios desde hahu kampana iha dia 10 Abril to’o ohin loron la’o diak.
Nia hateten, desde hahu kampanha elisaun antisipada iha dia 10 Abril to’o dadaun ne’e sei dauk iha problema, tanba seguransa iha fatin hotu la’o diak no hakmatek.
“Relatorio ne’ebe mak hau simu husi komando munisipio sira, katak seidauk rejisto problema ruma durante kampanha,” Komisario Hornai hateten, iha Dili.
Tanba nian dehan, PNTL ho F-FDTL servisu hamutuk hodi asegura seguransa atu nune’e lider partidos politiku halo sira nia kampanha la’o diak no hakmatek.
Nia dehan, durante atividade kampanha ne’e mos seiduk mosu konflito ga problema ruma tanba iha 13 munisipios ne’e hetan seguransa maximu husi membrus PNTL ho F-FDTL.
Entretanto Segundu Komandante mu Munisipio Dili, Superintendente Assistente Polisia Euclides Belo hateten, iha kampanha ne’ebe mak la’o ona durante hahu to’o agora iha Munisipio Dili la’o diak no hakmatek la iha problema .
Nia mos dehan, durante prosesu kampanha ne’e seidauk iha konflito ruma ka asidente, insidente ruma mak akontese, buat hotu la’o diak.
“Tanba ita nia kordenador kordenador partido nivel munisipio sira sempre kolabora ho autoridade seguransa hodi kontrola iha kampanha,” nia dehan.
Nia dehan, iha kampanha hahu to’o agora ne’e sira seidauk rejisto kazu ka konflito ruma tanba eleitor sira mos kumpri regras ne’ebe mak Comisaun Nasional Elisaun(CNE) fo sai.