Komisaun Organizadora ba eventu Marsa da Paz (peace walk), Jonato dos Santos Luciano hateten joventude mak tenke sai sentru ba unidade hodi promove diversidade iha unidade nasional.

Komisaun organizadora Peace Walk, Jonato Luciano hateten joventude tenke sai sentru ba unidade nasional.

“Joventude promove valor no norma demokrasia pluralismu nudar baze fundamentu hodi atinji prospriedade no paz iha Estadu Timor-Leste,” nia hateten, iha eventu Marsa da Paz ne’ebe hala’o foin lalais ne’e, iha Dili.
Nia hateten, eventu ida ne’e ho objetivo prinsipal mak atu fanun konsiensia husi joventude Timor-Leste atu bele kontribui ba paz no unidade nasional.
“Ita refleta kondisaun sosial politika ne’ebe akontese dadauk iha ita nia le’et, nudar joventude oinsa mak hatudu ita nia imagen ba sosiedade tomak, liu-liu ba povu doben iha Timor -Leste atu luta ba paz no estabilidade,” nia hateten.
Luta ba paz ne’e, nia dehan la’os aspetu ida mai deit husi governu maibe tenke mai husi joventude, katak jovens mak sai nain ba dame liu-liu iha situasaun ida hanesan agora ne’e,” nia dehan.
Nia dehan, oinsa mak joventude partilha informasuan paz ba sosiedade tomak,liu-liu ba povu iha rai doben ida ne’e, atu sira komprende oinsa atu luta ba paz.
“Liu husi marsa da paz ita hatudu mensagen da paz, simbolu da paz ba povu hotu-hotu,” nia dehan.
Iha parte seluk prezident ROTARY CLUB Dili, Joaquin Freitas Soares ne’ebe hola parte mos iha marsa ne’e hateten liu husi peace walk ida ne’e jovens sira hatudu ba publiku, katak sira hakarak paz no estabilidade.
“Katak dame iha Timor-Leste ne’e importante, e joventude sira mak sai autor ba dame, enkoraja ita nia lideransa sira atu kria paz dame liu-liuniha situasuan ida agora ne’e, ita nia lider sira han malu, insulta malu liu husi liafuan ne’ebe ladiak,” nia hateten.
Ne’ebe, nia dehan marsa da paz ida ne’e atu fanun lider sira atu oinsa mak kria paz no estabilidade iha povu nia le’et.
Alende ne’e, nia mos husu ba lider partidu politiku sira ne’ebe avansa iha elisaun antecipada atu simu rezultadu ho fuan nakloke tantu manan ga lakon iha elisaun.
“Ita hotu-hotu tenke simu ho orgulho rezultado ne’ebe mak iha, kria paz no estabilidade atu nune’e dezenvolvimentu iha rai laran bele la’o,” nia dehan.
Entretantu eis Sekretariu Estadu Joventude no Desportu, Leovigildo Hornai sente orgulho ho inisiativa joventude nian organiza eventu ida ne’e, tanba sira iha sensitive ba paz no dame.
“Inisiativa ne’ebe furak teb-tebes husi jovens sira e ita hein katak paz, estabilidade, tranquilidade no harmonia ne’ebe mak ema hotu hakarak, ita hametin liu husi diversidade,” nia esperansa.
Nia espera, ho eventu ida ne’e bele hametin liu tan unidade nasional, liu-liu bainhira anunsia rezultado elisaun, hotu-hotu tenke hakmatek no prontu simu rezultadu ne’ebe iha ho dignidade.
“Respeita ita nia povu iha rai doben ida ne’e atu bele moris hakmatek, iha unidade no paz nia laran,” nia apela.