Sábado, Dezembro 05, 2020
Total visitors: 539094

Asosiasaun Direitus Umanu (HAK) rekomenda ba governu foun mai atu aloka orsamentu ne’ebe adekuadu hodi harii prizaun juvenil, tanba numeru prizioneirus juvenil aumenta maka’as.

Asosiasaun HAK ejiji ba governu (foun) atu harii prizaun juvenil nian, tanba durante ne’e sira hamutuk deit ho ema adultu sira.

Diretor HAK, Manuel Monteiro hateten tratamentu ba prizioneirus juvenil no adulto agora dadaun hanesan deit tanba seidauk iha kondisaun, maibe ba futuru presiza tebes atu halo mudansa ba mentalidade foinsa’e sira nian no forma sira sai foinsa’e ne’ebe diak.
Nia dehan, iha prizaun Becora sira iha bloku ketak ba prizioneiru juvenil sira, maibe ambiente no tratamentu hanesan deit.
“Tenke hafahe sira ba prizioneiru adulto no juvenil sira, fo espasu hodi implementa programa edukasaun hanesan mos eskola formal sira seluk iha liur,” nia hateten.
Nia hateten, direitu atu hetan edukasaun formal ne’e garantia ona iha dekretu lei numeur 14/2014 kona ba regime ezekusaun penal nian.
Nia espera, ho elisaun antisipada parlamentar tinan ne’e (2018) bele iha ona governu ida ne’ebe dura no forte hodi responde ba iha ejizensia sira ne’e, liu –liu harii prizaun juvenil ba foinsa’e sira ne’ebe komete krime.
Portantu dadus atual tinan 2018, total prizioneirus iha Timor –Leste hamutuk 719 no husi total ne’e iha prizioneirus juvenil idade tinan 16-21 hamutuk nain 19.
Prizoneiru sira ne’e, nia dehan komete kazu krime oi-oin ne’ebe balun hetan ona statutu kondenadu, e balun sei hanesan prizioneiru preventive.
Diretor Nasional Servisu Prizional no Reinsersaun Social iha Ministerio Justisa, Helder Cosme Marçal Belo hateten iha planu estrategiku setor justisa hakerek klaru, tenke tau fatin ketak ba juvenil sira ne’ebe konflitu ho lei.
Nia dehan, bazeia ba planu ne’e sira identifika ona rai no prepara ona dezenho, BOQ, maibe orsamentu seidauk iha atu hahu konstrusaun.
“Ita hein deit desizaun politika governu nian, tanba ita nia nasaun ne’e iha nesesidade barak e estado tenke haree prioridade sira ne’ebe ita infrenta,” nia hateten.
Nia hateten, iha prizaun seidauk implementa programa edukasaun formal, maibe iha atividade formasaun vokasional hirak ne’ebe fornese husi parseiru no organizasaun sosiedade sivil sira hanesan abilidade moris no seluk tan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04