- Publika iha: 27 Agosto 2011
Membru Parlamentu Nasional Deputadu Domingos da Costa hateten katak, sidadaun Timoroan nebe mak hela iha estranjeiru, liu liu iha Republika Indonesia,ne’ebe iha iha kartaun sidadaun la iha direitu atu tuir votassaun tamba kontradis kartaun sidadaun nasaun seluk nian.
“Ami halo ona lei ida ba ita nia labarik sira ne’ebe iha liur atu tuir mos iha votasaun konaba 2012 nian tenki hare lolos ita nia ema sira nebe iha kartaun, iha pasaporte Timor nian,ne mak ita bele konsidera. Maibe sira nebe uza fali kartaun [sidadaun] Indonesia nian la iha direitu atu tuir eleisaun,” hateten Deputadu Domingos da Costa iha Parlamentu Nasional, Dili, semana kotuk.
Tuir Deputadu da Costa importante mak katak sidadaun Timoroan ho sidadania rua tenki cek katak sira nia estautu nudar sidadaun nasaun rua la kontradiz regulamentu nasaun rua ne’e kona ba partisipasaun iha eleisaun.
“Buat nebe mak atu ajuda, sira tenki identifika lolos nudar sidadaun Timoroan tenki iha surat sidadaun Timor no mos pasaporte Timor nian mak foin bele tuir votasaun,” haktuir Deputadu da Costa.
Entretantu tuir Deputadu Pedro da Costa Martires katak Timor-Leste nia lei admiti ita Timorona atu iha sidadania dupla ou triplu tan.
“Tamba ita Timoroan sira balun sidadaun Portugues, balun mos sidadaun Australiano, sira mos hetan kartaun eleitoral Timorense nian tamba ita nia lei admiti,” hateten Deputadu Martires.
Enkuantu Deputadu Alberto da Silva Cruz afirma katak, sidadaun hotu hotu iha direitu fo ninia votus iha eleisaun .
‘’Nia mos senti nia an katak, nia hadomi nasaun ida ne’e, nia tenki esforsu an iha kartaun sidadaun atu nune’e nia hili tuir lideransa nebe mak diak para aban bainrua nia fila mai bele hare ba nasaun ida ne’e,” hateten Deputadu Cruz.
Nia dehan Timoroan nebe mak hela iha Indonesia mak iha kartaun sidadaun rua, lei Indonesia nian la premiti iha atu tuir votasaun maibe tenki ida deit.
“Ida maibe ita hare tok, mas prosesu ne’e sei lao hela, bele iha neba fo mai sira hanesan sidadaun Timor-Leste bele vota ka lae,” hateten tan Deputadu Cruz.
Deputadu ne’e mos esplika katak lei Indonesia nian la admiti sidadaun ida iha pasa porte rua maibe sira so sidadaun uniku deit.
“Nebe ita dehan sidadaun Timorense oan nebe moris iha ne’e maibe agora hela ona iha Indonesia, sira iha pasaporte Indonesia nian, sira la iha direitu atu tuir votasaun “
Nia dehan tan katak sidadaun Timoroan nebe estuda iha Indonesia maibe pasaporte Timor nian,ida ne’e situasaun diferente tanba hirak ne’e sei nafatin sidadaun Timoroan no iha direitu tomak atu tuir votasaun .
“Sidadaun Indonesia nebe mak hela iha Timor,sira nia eleitoral lejalijadu tiha ona, iha bilheti identidade Timor ninian no pasaporte Timor nian sira iha direitu atu tuir votasaun” Deputadu da Cruz haktuir.
Wainhira jornalista ne’e tenta konfirma asuntu ne’e ba iha Komisaun nasional Eleisoens (CNE) maibe prejidenti komisaun nasional Eleisoens Dr. Faustino Cardoju la iha fatin.
