- Publika iha: 16 Setembro 2011
Maske lei UNTAET 27-29/2000, bandu ona atu labele tesi ai ho arbiru maibe komunidade kontinua tesi ai tanba menus de rekursu umanu iha Diresaun Nasional Florestal nian atu kontrola.
Tuir Prezidente Komisaun D Parlamentar, Brigida Coreia katak kestaun tesi ai ho illegal dalabarak ona iha plenaria maibe situasaun laiha mudansa.
“Durante ne’e ami mos preokupa maka’as maibe ita nia rekursu limitadu oinsa mak bele kontrola maluk sira ne’ebe kontinua tesi no fa’an iha Dili laran,”preokupa Deputada Brigida Coreia, semana kotuk iha PN.
Tuir atual dosente Universidade Nasional Timor-Lorosa’e (UNTL) iha Fakuldade Agrikutlura ne’e katak, bainhira komunidade kontinua tesi ai, mak sei hamosu inundasaun iha tempu udan.
Nia hatutan, komunidade sira kontinua tesi ai tanba atu sustenta sira nia familia e mos parte ida ajuda hodi fa’an ba maluk sira ne’ebe sei moris iha susar nia laran.
“Tanba ne’e mak husi diresaun florestal, sei fo toleransia ba sira maibe husu mos ba maluk sira atu iha konsiensia rasik, ” nia katak.
Entretantu tuir Deputadu Adriano Joáo, hanesan membru Komisaun D katak, problema fundamentu la’os iha sira ne’ebe fa’an ai ne’e maibe sira ne’ebe tesi “tanba ne’e Ministeriu Agrikultura liu husi sira nia guarda florestal tenke intensifika sira nia servisu,”.
Tanba tuir nia,kuandu komunidade kontinua tesi ai mak sei fo impaktu ladiak ba meiu ambiente.
“Bainhira udan mai bee lori hotu ai sira ne’ebe mak abut dodok ona, udan been la bele infiltra fali iha rai laran,” Adriano dehan.
Maske nune’e, Deputadu ne’e rekonese katak membru guarda florestal oras ne’e dadaun sei limitadu inklui transporte ne’ebe limitadu difikulta sira atu kontrola area Timor-leste ne’ebe luan.
Enkuantu bainhira jornalista tenta konfirma asuntu ne’e ba iha Diretor Nasional Florestal, maibe la konsege tanba okupadu.
