- Publika iha: 27 Abril 2012
Diretor Empregu iha Sekretariu Estadu Formasaun Profesional e Empregu (SEFOPE), Paulo Alves dehan, husi total trabalhadores Timor oan ne’ebe servisu iha Korea du Sul, nain 30 konsidera servisu ho illegal tanba servisu iha kompania ne’ebe la halo akordu ho Governu Timor-Leste.“Ami fo hanoin nafatin ba sira direitamente, bainhira vizita ba Korea de Sul no liu husi adidu do trabalho atu haruka trabalhadores Timor oan ne’ebe halao servisu ho estatus ilegal atu fila mai, maibe trabalhadores sira ulun to’os no dehan polisia migrasaun mai, mak ami hafuhu malu,” dehan Diretor Alves, semana kotuk (12/04) iha nia knar fatin Kaikoli, Dili.
Tuir nia, trabalhadores hirak ne’e ba servisu iha kompania seluk (laiha akordu ho governu) tanba salariu bo’ot liu kompara ho kompania ne’ebe sira servisu uluk, e mos tanba la familiar ho kondisaun ne’ebe iha.
Diretor Alves dehan, sira nain 30 ne’e konsidera illegal, no bainhira polisia imigrasaun Korea du Sul nian hetan bele halo kapturasaun no deporta sira.
Antes desloka ba Korea du Sul, trabalhadores sira ne’e hetan ona preliminary training hanesan hatudu video oinsa kondisaun servisu iha area Peskas, Fabrika no Agrikultura e laiha ida mak duvida, maibe to’o iha Korea sira la pasensia ho servisu ne’ebe iha.
Iha parte seluk Prezidente Konfederasaun Sindikatu Timor-Leste (KSTL), José da Conceição da Costa hateten, problema ne’e difisil oituan atu resolve, tanba trabalhadores sira rasik mak halai, hodi servisu fali iha kompania ne’ebe lahalo kontratu ho governu.
Tuir nia, governu iha obrigasaun atu kopera ho governu Korea no kompania hodi haruka sira fila, tanba fo impaktu ladiak ba kontinuasaun akordu iha future ba governu rua ne’e.
“Hau hanoin atitude ne’e ladiak, presiza atu toma atensaun entau ami sei halo komunikasaun ho governu liu husi SEFOPE atu bele resolve, hodi labele fo impaktu ba akordu ne’ebe iha,” dehan Prezidente da Costa.
