- Publika iha: 14 Outubro 2014
Sekretariadu Estado Meiu Ambiente (SEMA) organiza wokshop hamutuk ho stakeholder sira hodi halo revizaun ba planu estrategiku biodiversidade durante tinan lima oin mai.
Diretor Jeral Sekretario Estado Meiu Ambiente, João Carlos Soares, hateten planu estratejiku ba biodiversidade lolos iha ona, maibe ho mudansa estruturasaun governu, entaun tenke halo revizaun fali planu foun.
“Ami iha distritu iha ema nian tolu ka hat deit guarda florestal, entaun ita labele kntrola atividades ne’e hotu,”Diretr Jeral, Soares hateten, bainhira abertura Workshop revizaun planu estrategiku biodiversidade iha salaun João Paulo, Dili.
Tanba ne’e, nia dehan, workshop ida ne’e importante tebes atu hadia linha koordenasaun entre stakeholder sira hodi bele proteje rekursu sira ne’ebe iha parte maritima (ikan, ahu ruin no seluk tan) inklui mos iha rai maran hanesan animal sira ne’e.
Iha parte seluk, Koordenador organizasaun Hasatil, Gil Oracio Boavida, hateten sorumutu sira hanesan ne’e importante tebes, atu bele fo hanoin hamutuk hodi halo jestaun no fo protesaun ba rekursu sira ne’ebe iha.
“Tenke hamosu politika ne’ebe fo mos alternativa ba ita nia populasaun sira, atu sira mos bele apar ho politika ne’ebe iha se lae politika lao ketketak kontrolu laiha tan implementasuan iha baze konfuzaun bo’ot,” Boavida hateten.
Nia haktuir, iha atividade konservasaun rekursu lubuk ida mak SEMA halo ona maibe presiza hare fila fali progresu no dezafius hodi bele hadia iha futuru.