- Publika iha: 07 Outubro 2016
Alumni Parlamentu Foinsa’e Timor –Leste (APTL), halo sosializasaun ba estudantes ensino sekundario kona ba rezolusaun konflitu.
Presidente APTL, Zaulino da Silva hateten programa sosializasaun ne’e ho objeitu atu muda karakter foinsa’e sira nian hodi rezolve problemas sen violensia.
“Sosializasaun ne’e ba iha konseilho estudantes atu sira bele sai lideransa ne’ebe hatene maneja sira nia escola atu labele mosu konflitu iha eskola entre studantes no profesores,” nia hateten iha servisu fatin Becora Dili.
Violensia tuku malu entre profesores no estudantes ne’ebe sempre akontese iha Timor –Leste, dala ruma involve kazu asaltu serius sira.
Nia dehan konflitu entre estudantes no profesores akontese iha escola tanba laiha maneira komunikasaun ne’ebe diak atu resolve problema.
Nia informa atividade sosializasaun sira halao ona iha ensino sekundario Cristal no escola publika 28 Novembru.
Tuir planu sei halao tan iha escola publiku no privado balun iha Munisipio Baucau.
Alende ne’e nia dehan atividade ne’ebe hanesan sei halo mos iha komunidade fo hanoin foinsa’e sira kontribui ba iha paz no estabilidade iha rai laran durante elisaun jeral 2017.
“Foinsa’e sira iha dirietu tomak involve iha politika maibe importante joven hotu ne’ebe involve iha politika tenke ho etika no karakter ne’ebe siviku,” nia hateten.
Iha parte seluk, Presidente Konseilho National Joventude (CNJTL), Dadina Maria hateten APTL iha responsabilidade bo’ot atu fahe esperensia no matenek ne’ebe sira hetan ba sosiedade sira liu –liu foinsa’e, tanba estado investe ona ba sira.
“Sira tenke obedese sira nia matenek, kuinesementu no abilidade ba sosiedade ida ne’e,” nia hateten.
Hanesan organizasaun foinsa’e nia dehan iha servisu barak ne’ebe presiza halo liu –liu enkoraja foinsa’e sira seluk atu aprende no prepara an sai lideransa ne’ebe kompotente iha futuru.
Nia informa programa sosializasaun ne’e hetan apoiu fudus hui governu no parseiru dezenvolvimentu koperasaun husi Alemania GIZ.
APFTL, hanesan asosiasaun foinsa’e ne’ebe estabelese tinan kotuk ne’ebe sei hare liu ba iha edukasaun sivika ba foisa’e sira no enkoraja foinsa’e sira involve ativu iha prosesu dezenvolvimentu.
