- Publika iha: 27 Abril 2012
Tuir Prezidente Konfederasaun Sindikatu Timor-Leste (KSTL), José da Conceição da Costa katak, servisu ne’ebe kategoria todan no fo ameasa ba labarik ho idade 10 to’o 16 anos nia vida, mak hanesan servisu agrikultura, konstrusaun no servisu domestika seluk ne’ebe konsidera todan.Prezidente KSTL da Costa, dehan servisu hirak ne’e fo impaktu ladiak ba labarik sira nia future, tanba sira laiha oportunidade atu asesu ba edukasaun.
“Ita seidauk halo peskiza ida kona ba setor agrikultura, liu-liu iha area remotas katak iha familia balun uza ona pestisida (bahan kimika), ne’e perigoju ba involvimentu labarik nian tanba bele prejudika labarik nia saúde,” dehan Prezidente KSTL da Costa, semana kotuk (18/04) iha nia knar fatin Colmera, Dili.
Nia hatutan, iha 2001 iha labarik barak mak ema uza hodi halo negosio CD pornografia, ne’e laos servisu ne’ebe todan maibe perigu ba labarik ho idade minoridade sira, tanba bele hamosu hanoin ne’ebe negativu no halo bele involve an iha atividade prostituisaun.
Iha parte seluk Diretora Nasional Relasaun Trabalhu, Auxiliadora de Gusmão Guterres hateten, SEFOPE liu husi diresaun do trabalho hetan apoiu husi organizasaun internasional do trabalho liu husi programa eliminasaun trabalhu infantil (IPEC ) seidauk rekolha dadus kona ba servisu ne’ebe fo perigu ba labarik ne’ebe ho idade 18 anos.
“Ita espera katak Komisaun Nasional Kontra Trabalho Infantil (KNTI) hetan duni aprovasaun husi Konselhu Ministru no estabelese duni, e sira mak sei define lista servisu perigozu ba labarik no fo protesaun ba labarik iha servisu perigoju,” Diretora Guterres dehan.
Nia hatutan, sira seidauk identifika lolos numeru involvimentu labarik iha servisu ne’ebe kategoria todan hanesan agrikultura, konstrusaun no seluk, maibe involvimentu labarik iha seitor agrikultura ne’e ho numeru ne’ebe bo’ot liu-liu area remotas sira alende ne’e iha capital labarik barak mak halao servisu hodi ajuda inan aman hanesan servisu domestika nune’e mos faan pulsa iha dalan ninin.
