- Publika iha: 10 Novembro 2016
Grupo komunidade nain 16 tuir formasaun durante semana ida iha sentru formasaun Hamutuk Ita Ajuda Malu (HIAM Health) kona ba prosesu halo adubu organiku ne’ebe diak.
Manager Programa Cruz Vermelha Timor –Leste (CVTL), Maria Pascoela hateten grupo komunidades ne’e estabelesido iha munisipio Viqueque, Aileu, Covalima, Bobonaro, Lautem, Manatutu no Dili ne’ebe durante ne’e hetan apoiu teknika husi CVTL.
“Sira sei uza adubu kimiku durante ne’e, tanba sira lahatene halo adubu organiku entaun sira mai aprende iha ne’e no fila ba sira hanorin fali grupo seluk,” nia hateten via telephone.
Nia dehan, objetivu husi formasaun ida ne’e atu hakbi’it komunidades ne’ebe buka moris husi setor agrikultura liu –liu hortikultura.
Nia hatutan, programa kapasitasaun ne’e hetan apoiu fundus husi Cruz Vermeilha Australia, Nova Zelandia, Britis no Korea.
Entretantu Diretora Organizasaun HIAM Health, Rosaria Martins da Cruz hateten materia ne’ebe partisipante sira sei hetan ne’e pakote, sira aprende kona ba prosesu halo adubu no aimoruk pestisida organiku inklui nutrisaun.
“Ami fo kapasitasaun ba sira no sira lori fila matenek no konesementu ne’ebe sira hetan ba implementa iha sira nia suku,” nia hateten.
Nia hatutan, kooperasaun servisu entre HIAM Health no CVTL lao kleur ona no formasaun ida ne’e dala tolu ba voluntario no grupo komunidade ne’ebe CVTL estabelese.
HIAM Health organizasaun local ne’ebe harii iha tinan 2003 ho nia programa importante lubuk ida ba luta kontra malnutrisaun iha rai laran, liu husi fo eduakasaun ba komunidade atu haan aihan ene’be saudavel no apoiu komunidades kuda aihoris ne’ebe iha valor nutrisaun.
